L’Estat Islamic ven de publicar tornarmai sus Internet la decapitacion d’una autra persona. Aqueste còp la victima es lo cooperant britanic David Haines, qu’a 44 ans foguèt raubat fa un an e mièg en Siria. Al delà, sembla que los jihadistas an menaçat de matar un quatren ostatge, tanben britanic.
 
Dins lo vidèo, que Jornalet publicarà pas, los jihadistas acusan lo primièr ministre del Reialme Unit, David Cameron, d’èsser lo responsable d’aquela decapitacion. De son costat, Cameron a qualificat lo crime de “mespresable e atròç”. “Son pas de musulmans, son de mostres”, çò a dich lo primièr ministre en afirmant que perseguirà los colpables. De son costat, lo president estatsunidenc, Barack Obama, a promés que trabalharà amb lo Reialme Unit per menar los assassins davant la justícia.
 
Haines es la tresena persona que l’Estat Islamic decapita en publicant lo vidèo de l’execucion sus Internet, après los jornalistas estatsunidencs James Foley e Steven Sotloff. Scotland Yard suspècta que lo borrèl de las tres execucions seriá lo meteis, un jihadista britanic, a ne jutjar per son accent quand parla anglés sus aqueles vidèos macabres.