Un avion tombèt dissabte a La Lobèra (País de Tarba) a 16h43, tot al costat de l’aerodròm. Tres paracasudistas capitèron a sautar del temps que lo pilòt, Éric Fradin, se sacrifiquèt per téner lo contraròtle de l’aparelh e evitar que tombèsse sus una zòna abitada, segon çò que rapòrta La Dépêche. Un dels paracasudistas es en observacion clinica.
 
Fradin, de 47 ans, volava a bòrd d’un aparelh Cessna 206 e anava vèrs l’aerodròm bigordan. Èra un èx-militar, instructor de naut nivèl en cò d’Airbus.
 
Dos paracasudistas poguèron sautar e un autre s’ejectèt, del temps que lo pilòt preferiguèt téner lo contraròtle de l’aparelh per que tombèsse pas suls ostals, segon çò qu’an declarat los companhs del pilòt que vegèron tota la scèna del sòl estant.
 
L’enquèsta es estada fisada a la polícia de l’aire e de las frontièras de Tarba. Segon los primièrs elements, l’avion efectuèt un primièr largatge de dos paracasudistas a 1000 mètres abans de pojar a 3000 mètres e de tombar en virant.
 
Fradin, que demorava en País Tolosan, èra un fidèl del club tarbés. Dissabte, sos companhs despleguèron las velas de dòl.