Los escolans del licèu Victor Hugo de Galhac an mostrat lor sosten al movement que lucha contra la construccion d’una restanca al bòsc de Sivens, segon çò que rapòrta Le Tarn Libre. Los liceans manifestèron diluns passat en tot se declarar en cauma, mas bloquèron pas las pòrtas del licèu e mai s’avián anonciat qu’o farián.
 
Los escolans se dison “concernits per l’avenir de nòstra planeta” e denoncièron que las fòrças de l’òrdre los butassèron e mai lor arranquèron e confisquèron de pancartas. De fach la polícia s’es mostrada abitualament plan violenta amb lo movement, que dempuèi novembre passat resistís contra lo projècte d’una restanca dins la zòna umida de Testet, al bòsc de Sivens (Galhaqués).
 
Aquel collectiu, qu’a ja dos caumaires de la fam, foguèt present diluns amb los liceans e participèt a lors accions de la jornada: assetadas, musica, projeccions de filmes, manifestacions en vila, pica-nica…
 
 
Lo projècte contra lo qual luchan
 
La restanca prevista, d’un milion e mièg de mètres cubes d’aiga, negarà una part de la Val de Tescon, en tot far desaparéisser 13 ectaras de zòna umida e en fasent desaparéisser un milion d’animals salvatges (de granhòtas, de peisses o de salamandras). Lo conselh general de Tarn cita lo Ministèri francés de l’Environament, segon lo qual la restanca auriá de vertuts ecologicas, cercant un “equilibri idrologic” de la zòna, çò que los ecologistas creson pas. S’opausan al projècte e denóncian qu’es finançat per de fonzes publics per favorir solament d’interèsses privats.
 
Aquel collectiu emplegan lo tèrme francitan bouilles, en definir ansin los bolhasses coma “de tèrras o pradas umidas sens valor financièra”, en tot ne revendicar lor preservacion, e tanben de totas las 35 ectaras de zòna umida menaçadas per la restanca. Denóncian que la tòca del projècte es de favorizar l’agricultura intensiva e que, per tant, es un perilh per un centenat d’espècias “protegidas” dont cinc son ja declaradas menaçadas.
 
Cridan d’individús, de comitats, de collectius e d’autras fòrças de resisténcia a organizar d’accions descentralizadas al ras de las entrepresas e las institucions engatjadas dins lo projècte de restanca: CACG, Ador-Garona, conselhs generals de Tarn e de Tarn e Garona e tanben las prefecturas, lo Ministèri de l’Ecologia, las comunautats europèas, etc.
 
Lo collectiu ensajan de tornar abitar la zòna per empedir la construccion de la restanca. Declaran que lor “resisténcia es dinamica e creativa” e que luchan “contra un sistèma de las idèas e de las practicas, mas dins cap de cas contra d’individús”.