S’amassèron diluns a París un trentenat de dirigents mondials, dont un desenat de païses arabis, per luchar amassa contra l’Estat Islamic. Aqueles estats signèron un engatjament a ajudar lo govèrn d’Iraq, amb de ressorsas militaras se caliá.
 
Lo document final es ambigú perque detalha pas qualas son aquelas ajudas. Se prevei de bombardaments aerians, d’ajuda umanitària e de sosten financièr segon çò que lo govèrn iraquian demande. Per ara, l’estat francés a mandat d’avions de reconeissença.
 
Aqueles païses an tanben defendut dins un manifèst “l’unitat, l’integritat territoriala e la sobeiranetat d’Iraq”, çò qu’ajudarà pas brica als curds dins la lucha per lor independéncia. Los aliats an tanplan celebrat la formacion d’un nòu govèrn menat per Haydar Al Abadi, lo nòu primièr ministre iraquian nomenat amb lo sosten d’Euròpa.
 
Pendent la conferéncia, lo president francés, François Hollande, demandèt una responsa globala contra los jihadistas de l’Estat Islamic e tanben demandèt d’ajudar los opausants al govèrn sirian. Cal soslinhar, totun, qu’aqueles jihadistas, que tanben luchan contra lo govèrn de Bashshar Al Asad, i èran pas abans la guèrra dels Estats Units contra Iraq, mas qu’a l’ora d’ara son a créisser d’un biais inquietant en efectius e en argent.




Une conférence sur la lutte contre l'Etat...por euronews-fr