Los ciutadans d’Escòcia decidisson uèi lor avenir en un referendum. 307 annadas après la signatura de l’Union entre Anglatèrra e Escòcia, los escoceses an l’escasença de decidir, dins las urnas, se vòlon contunhar de far partida del Reialme Unit o se se’n vòlon separar. Aquel vòte seguís la tradicion de far las eleccions generalas un dijòus.
 
Los elegeires devon respondre de “òc” o de “non” a la qestion: “Escòcia deu èsser un país independent?” Lo resultat lo sauprem deman de matin.
 
Son cridats a votar totes los residents en Escòcia de mai de setze ans que se sián inscriches dins lo registre electoral local. En aquel registre s’i podián inscriure 370 000 angleses, 32 000 nòrd-irlandeses e 15 000 galeses que demòran en Escòcia; e tanben los residents d’autres païses del Commonwealth e de l’Union Europèa. Per contra, pòdon pas votar aperaquí 800 000 escoceses que demòran en Anglaterra, Galas e lo nòrd d’Irlanda.
 
Los partisans de l’“òc” s’amassan dins doas campanhas oficialas, qu’entre elas la que li dison “Yes Scotland” (Òc Escòcia) a lo sosten explicit del Partit Nacional Escocés (SNP), qu’es al govèrn del país, e tanben la sostenon Los Verds. Los partisans del “non” sostenon la campanha nomenada “Better Together” (Melhor amassa) qu’a lo sosten del Partit Laborista, lo Partit Conservator, lo Partit Liberaldemocrata e lo partit antieuropeïsta UKIP.
 
Segon la majoritat dels sondatges ganhariá lo “non”, e mai se los partisans de l’“òc” an experimentat una tendéncia a pojar fins a arribar a la victòria segon qualques sondatges. Totes los sondatges son amassats dins un sit web interactiu de la BBC.
 
Se ganha l’òc, la declaracion d’independéncia es prevista en març de 2016, e al mes de mai seguent se debanarián las primièras eleccions del Parlament escocés independent. Se ganha lo non, los escoceses auràn totun un autogovèrn melhorat amb mai de competéncias, segon çò qu’an prepausat totes los partits unionistas.