Una jove catalana de Perpinhan, Myriam, escolana en classa de primièra ES, se fa refusar l’intrada de son licèu dempuèi diluns. La liceana patís una malautiá que li fa pèrdre los pels del cap. Fins ara amagava sa condicion en portar un sarracap, un accessòri autorizat pel reglament interior de l’establiment escolar. Mas los simptòmas se son agravats e desenant la joveneta desira de poder portar una casqueta que cobrisca tota sa clòsca. Mas lo reglament de l’escòla o interditz. Per aquesta rason la liceana s’es vista refusar l’accès a son licèu. Amb la tòca d’un bon comportament, l’interdiccion del pòrt de casquetas es un usatge general dins las escòlas de l’estat francés. Mas aquí s’agís pas d’un còde de comportament. Se tracta d’una necessitat medicala: Myriam ten una prescripcion medicala que l’autoriza a portar la casqueta. D’efièch çò qu’es bon per son moral es bon per sa malautiá.
 
Quand aprenguèron la nòva de son exclusion, sos companhs d’estudis, solidaris de Myriam, an defendut lor camarada en organizar un sit-in dins la cort del licèu. De son costat, la direccion del licèu a organizat un acamp amb los representants de las familhas e dels escolans. Segon lo director del licèu, s’i seriá decidit a l’unanimitat de non pas cambiar lo reglament interior e de contunhar l’interdiccion de las casquetas sens preveire d’excepcions.
 
Davant l’incapacitat de l’estructura educativa de s’adaptar a aqueste cas especial, la demanda de la familha es estada transmesa al rector d’acadèmia que prendrà la decision finala. Serà doncas lo representant de l’estat francés per l’ensenhament que decidirà s’una chatona de 17 ans que lucha amb son pichons mejans contra la malautiá serà o pas autorizada a portar la casqueta que la se farà sentir melhor.
 
 


TL