Una còla de neuroscientifics an capitat d’establir una comunicacion telepatica, dirècta e conscienta, entre dos cervèls umans que se trobavan a 7800 quilomètres de distància un de l’autre. L’experiéncia foguèt publicada dins la revista scientifica Plus One e se debanèt lo 28 de març passat, quand se transmetèt lo mot espanhòl “hola” (“adieu” en occitan) dempuèi l’emissor qu’èra dins vila de Thiruvananthapuram (Índia) fins al cervèl del receptor, qu’èra en Estrasborg (Alsàcia).
 
Lo mot “hola” se codifiquèt en còde binari, transformat en 140 bits d’informacion transmeses per Internet. L’emissor portava un casco amb d’electròdes, qu’enregistèt los cambiaments de l’electroencefalograma del cervèl al moment que pensèt lo mot “hola” e los convertiguèt en còde binari. Lo receptor recebèt, via Internet, lo messatge per mejan d’una interfàcia que convertiguèt aqueles 140 bits en de belugas de lutz qu’apareisson dins la vision periferica. Aital, lo receptor, amb los uèlhs cobèrts, podiá interpretar l’1 quan notava la beluga e lo 0 quand la remarcava pas.
 
Dètz jorns puèi se tornèt ensajar l’experiéncia, en retransmetent amb succès, lo mot italian “ciao” (“chau” en occitan).
 
Amb aquela experiéncia, los scientifics an dobèrt una pòrta importanta en la recèrca de las comunicacions dirèctas e non-invasivas de las emocions e dels sentiments, e dins la connexion dirècta de captors solament amb l’estimulacion cerebrala. Se prevei que dins un avenir pròche, los nòstres cervèls poiràn interagir amb los ordenadors.