Dimècres passat, de representants del Govèrn d’Aran s’amassèron a Vielha amb d’autoritats dels govèrns francés, andorran, navarrés, aragonés e catalan per tractar l’avenir de l’orsalhona Aubèrta, la petita orsalhona que trobèron perduda en Aubèrt (Val d’Aran) en abril passat.
 
Segon çò que rapòrta lo Conselh General d’Aran, lo grop de trabalh transfrontalièr arribèt a la conclusion que lo desvolopament de l’orsa es corrècte, tant a nivèl fisic coma al de comportament, e que se la pòt remetre a la vida salvatja. Se decidiguèt de liberar Aubèrta en ivèrn se la climatologia e la disposicion de noiridura o permeton. Se parlèt de transferir Aubèrta dins qualque endrech dels Pirenèus occidentals, perque i a solament dos mascles. Mas Aragon e Navarra refusan aquela opcion, e cal veire çò que ditz lo govèrn francés a respècte de la libertat de l’orsa en Bearn. Per ara son arribats a l’acòrdi que metràn a Aubèrta de marcas visualas sus las aurelhas, un emissor de radioseguiment e un emissor GPS.
 
A l’ora d’ara, Aubèrta viu en estat de semilibertat dins un enclaus de 5000 mètres cairats ont se l’alimenta segon un protocòl internacional per garentir l’isolament de la bèstia a respècte de las personas.