Lo campion en títol èra esperat: per lo moment los espanhòus an pas decebut puish qu’acaban prumèr deu grop C. Mes l’encontre ger ser contra Croàcia ei pas estat una passejada. Espanha a devut esperar la tota fin de partida per obrir l’escòre mercés a l’andalós Jesús Navas.

Se los croates son demorats pro prudents, ei per’mor qu'un resultat nul èra sufisent per estar qualificats. Maugrat una tactica resolument defensiva de Croàcia, Espanha a pas sabut estar pro eficaça quitament se coma de costuma, a menat dens la possession de bala.

 

Dab aquera desfèita 1 - 0, Croàcia ei eliminada de la competicion per Itàlia. Los espanhòus eths encontraràn lo dusau deu grop D, lo de França.

 

 

 

Itàlia ger ser avè pas sa destinada entre las mans. Calèva assegurar la victòria contra Irlanda, ja eliminada, e esperar una victòria d’Espanha. Ei exactament çò qui s’ei passat. Cassano, sus un servici de Pirlo, a balhat l’avantatge a la Squadra Azzura e Balotelli a botat un tèrmi au suspens en fin de partida, per una victòria 2 - 0.

 

Los italians son bethlèu estats recompensats per una generositat dens l’animacion ofensiva que de costuma ei pas sa qualitat prumèra. Dab aquò, an enqüèra provat ger qu’èra pas aisida de bolegar la defensa de Chiellini. Totun en fàcia, èra pas qu’Irlanda qui maugrat una envèja evidenta de contentar sons suportaires, èra pas pro armada per anar mei luenh en la competicion. Per contra los italians, arribats quasi com toristas a l’Euro, confirman lor estatut d'outsider de luxe.

 

L’equipa de França, que jòga aqueste ser contra Suècia, poderé encontrar los italians en quarts. Un encontre deus beròis en perspectiva.

 

 

 

 

Matieu Casanòva