L’independentisme escocés a perdut lo referendum per de causas que se pòdon identificar. En primièr luòc, perque a perdut practicament en totes los districtes ont ganha regularament lo Partit Nacional Escocés (SNP). La victòria importanta a Glasgow a pas servit a compensar aquelas pèrdas. Aquela desfacha s’explica tanben perque los mai vièlhs an votat en massa contra l’independéncia, qu’èra l’opcion preferida pels joves e pels adultes, segon çò qu’analisa lo jornalista catalan Vicent Partal, sus Avui-El Punt TV. “Lo vòte dels grands a tuat lo sòmi de lors enfants e de lors felens”, çò ditz Partal.

Mai d’informacions sus Aquò d'Aquí: Escòcia: lo “non” de la paur còntra l’“òc” de la joinesa.

 
 

De grops d’unionistas d’ultradrecha provòcan d’incidents a Glasgow Après una campanha modèl e de reaccions impecablament educadas, divendres de nuèch arribèt la violéncia a Glasgow. De grops unionistas d’extrèma drecha, en brandant de bandièras del Reialme Unit e en fasent de saludacions nazis, s’afrontèron amb la polícia a Queen Street. Los manifestants, majoritàriament ebris, ataquèron de comèrcis que mostravan de signes de la campanha del “yes”. Segon divèrses testimònis metèron fuòc a una de las pòrtas del jornal Sunday Herald, qu’aviá sostengut l’òc.   Glasgow, la vila mai granda d’Escòcia, es una de las paucas ont ganhèt l’òc. Dins la vila i a un nuclèu important d’ultras unionistas, suportaires de l’esquipa de fotbòl dels Rangers, qu’an esperat per far de rambalh après lo referendum.