Safari catalan a Leeds
 
De còps, los sòmis venon realitat: sufís d’una pauma que rebala, d’una volontat caparruda e zo! Coma va escriviái lo còp passat, las tièras son faitas per s’arrestar un jorn. Atal, per las desfaitas sistematicas dels Dracs a Leeds dempuèi lor aparicion en Superliga . Dissabte de ser, la partida de las pelhòfas foguèt d’una intensitat dramatica. Los Rinocèros se lançavan a l’ataca, los Dracs placavan e tampavan los traucs, placavan e tornavan placar, mas Ablett marquèt a la 17a minuta, Sam Williams repliquèt aprèp una traucada del capitani Mounis. Sinfield passèt una penalitat, Escarré escampèt una pauma que se transformèt sul pic en ensag anglés; 14-6 a la pausa per Leeds. A la represa, Zeb Taia marquèt sus una passa al pè de Tomàs Bòsc puèi Loís Anderson balhava l’avantatge als catalans a l’ora de jòc. Los Rinocèros va volián pas atal e capitèron de faire plegar un tresen còp la defensa sang e aur a dètz minutas del tèrme: 20-18 pels angleses. La palanqueta de montada dins l’avion de retorn se desplegava doçament e inexorablament... Una darrièra ataca catalana, un còp de pè a seguir, l’arrièr local sortiguèt de l’en-but, mas sul tengut, l’alièr Briscoe pachaquèt la pauma que redolèt pel sòl, soleta per gaire de temps, l’espaci d’un liuç que Sam Williams arribèt lançat coma un avion d’Air France un jorn de represa del trabalh per aplatussar la pauma de la victòria catalana —mentre que restontissiá la còrna de la fin de la partida— que Tomàs Bòsc bonifiquèt amb sa quatrena transformacion de la serada: 24-20 pels Dracs! Lo venceires de la Cup reganhèron tot reganhuts lo vestiari lo cap acaptat, los uèlhs dins lo voide sideral de la desfaita, mentre que los Dracs se sarravan al mitan del terrenc a l’entorn del capitani Mounis. Seràn esperats al mitan de la nuèit a l’aeropòrt de Perpinhan e reçauputs per un Els Segadors volontari.
 
Bon, mas l’òbra es pas acabada: tre divendres, direccion Huddersfield e sos Gigants per anar fins a las mièjas finalas e, qui sap, al delà! Per sa part, Widnes somièt de temps a Warrington: menava 19-6 a la pausa mas marquèt cap de punt dins lo segond temps e perdèt fin finala 22-19. Dins lo naut del tablèu, los venceires s’impausèron plan aisidament: 57-4 per Wigan fàcia a Huddersfield e 41-0 per Saint Helens contra Castleford. L’autre barratge per las mièjas finalas se tendrà doncas dijòus amb l’oposion Castleford-Warrington.
 
 
Los Pols de l’espessor d’una pluma
 
En Austràlia, lo campionat NRL n’èra ja als barratges per las mièjas finalas. Los Pols-Roosters menèron 30-0 contra los Vaquièrs al cap de mièja ora de jòc. Lo North Queensland marquèt dos ensages abans la pausa (30-12) e prenguèt lo jòc a son compte dins lo segond temps per tornar a egalitat. Un tombat balhèt l’avantatge als Pols (31-30). Dins la darrièra accion, l’ensag del capitani Thurston foguèt refusat aprèp un espepissatge vidèo per una passa enabans miscrocopica de l’espessor d’un quart de camba de grilh: lo jogaire de l’an coneisserà pas un còp de mai los grands moments finals del campionat. Dins l’autra partida, los Dògols de Canterbury capitavan a s’impausar a Manly: 18-17. Lo tablèu de las mièjas finalas es doncas: Lapinons contra Pols per divendres e Pantèras contra Dògols per dissabte.
 
 
Los audencs en cap de fila
 
A Carcassona, dissabte, es aprèp l’interpretacion d’Aquela Trivala pel grop vocal de Cabardés Cossí que Siague que se dobriguèron los debats entre los locals e los campions-detentors de la Copa del Tolosa Olimpic. Los Negre e Jaune metèron la man sus la partida mercé a las cargas poderosas dels avants e a las iniciativas ofensivas de las linhas d’arrèire. Los Canaris menavan 18-6 per ganhar fin finala 26-12. Dimenge, a Limós, los lesinhaneses dominèron la partida fàcia a una esquipa rejovenida e en manca de fisança. Los Roge e Negre daissèron dobèrts unes baloards pels atacants de Corbièras que ne profeitèron: 38-12 al cap de las 80 minutas.
 
D’aquel temps, a Sant Estève, Vilanuèva resistiguèt tant coma poguèt als Dragonets mas s’inclinèt 38-24 mentre qu’Avinhon perdiá sus sa pelena fàcia als catalans de Palau: 36-18.
 
Aquesta dimenjada, lo 3n torn se dobrirà dissabte amb lo rescontre Tolosa-Vilanuèva (15h30) e lo dèrbi Carcassona-Limós a Domèc (18h30), puèi dimenge dèrbi catalan a Sant Estève entre Dragonets e Palau (15h15) mentre qu’al Molin, Lesinhan esperarà l’esquipa d’Avinhon (15h30). La dimenjada marcarà tanben la debuta del campionat de Nacionala 1 e tot Cabardés amb tot Menerbés se traparàn dimenge de vèspre dins la ciutat de las trufas negras de Vilanòva de Menerbés per la confrontacion entre l’esquipa locala e lo Vilagalhenc-Argon-Rugbi-Liga.
 
 
Desfensa del Rinocèros
 
Per las armas sensiblas que serián malcoradas de la debuta d’aquesta cronica qu’evòca un safari de rinocèros contrari als enjòcs del respècte de las bèstias e de la diversitat ecologica, rapelarai que sèm aicí dins una cronica esportiva ont nos agrada de faire dins l’allegoria, las metafòras e la mitologia universala a l’entorn de las bèstias que las còlhas d’Euròpa o d’Austràlia an presas coma referéncias totemicas e identitàrias. Pel rinocèros de quatre patas, vos podètz entresenhar al prèp, per exemple, del WWF. E nosaus, tot çò que sabèm, e la partida de Leeds n’es una demostracion de las bèlas, es que cal jogar las partidas fins a la còrna e que res es pas jamai perdut!
 
 
 
 
Alan Roch