Actualitats
Fin finala la mosqueta granda de Marselha serà bastida
Lo tribunal administratiu d'apèl a refusat las demandas de la tripariá qu'apelava a la justícia contra la mosqueta
La cort administrativa d'apèl de Marselha validèt ièr lo permís de bastir la futura mosqueta granda, çò qu'èra estat anullat pel tribunal administratiu en octòbre 2011 a la demanda d'una tripariá marselhesa.
La societat "Boyauderie-triperie méditerranéenne" aviá depausat una requista davant lo tribunal administratiu en demandant l'anullacion dels decrèts del cònsol de Marselha de 24 de setembre de 2009 e de 27 de mai de 2011 que balhavan lo permís de bastir a l'associacion "La Mosquée de Marseille" (La Mosqueta de Marselha).
Lo tribunal administratiu donèt la rason a la tripariá lo 27 d'octòbre, e l'associacion per la mosqueta aviá fach apèl. Lo tribunal administratiu d'apèl a refusat aqueste còp las demandas de la tripariá.
Sus una autre front judicial, lo tribunal administratiu d'apèl aviá refusat en decembre 2011 dos recorses depausats pel Front Nacional (FN) e lo Movement Nacional Republican (MNR), que volián tanben far anullar la deliberacion del conselh municipal qu'autorizava lo bastiment del temple.
Lo 20 de mai de 2012 se placèt la primièra pèira de la mosqueta e l'inauguracion èra prevista per 2011. Lo projècte prevei la bastison d'un grand temple per la vila qu'a mai de musulmans d'Occitània (a l'entorn de 250 000). D'estil mediterranèu es estada dessenhada pels arquitectes Thierry Chambon, Maxime Repaux e Frédéric Roustane, e se bastirà dins lo 15n districte de la capitala de Provença.
Finançada completament per de donatius privats de la comunitat musulmana de Marselha, es previst qu'age un minaret de 25 metres de nautada e la capacitat per 7000 fidèls. Aurà tanplan una bibliotèca, una escòla teologica, un restaurant e 450 plaças de parcatge.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Cossí bastir una mosqueta en Occitània sens provocar un tsunami compausat d'èrsas xonofobas, laïcas, occitanoindependentistas e mai encara?
1- causissétz un èrm al ras d'un periferic
2- qu'aquel luóc se situa al pé d'imòbles
3- que demòren dins aqueles imòbles los quite musulmans que la fequentaràn
4- bastssètz una torre que sembla gaire a un minaret
5- pel finançament pas que de donas privadas quitament que prengan las òbras d'ans alara que pel "Casino Barrière" (ostal de jòcs) a costat e al meteis temps s'apondràn d'agent public e que las lòbras prendràn qualques meses.
Sòmi?
Non!
Aquò existìs. Se bastiguèt dins aqueles condicions la mosqueta El Nour de Tolosa (En Palòt), sens cap de bruch e pas mai de dignitat.
#6
De segur Matieu, pas de problèma.
Avèm lo dreit (emai lo dever) de discutir e d'escambiar idèas diferentas.
Auràs comprés, çò me pensi, que soi pas una persona gaire religiosa. Es vertat que tèni sovent reaccions epidernicas fàcia a n'aquò . Ne fau un Mea Maxima Culpa! ;-)
Ai agut l'impression qu'aguères l'impression qu'èri un racista. O soi pas, ni tanpauc islamofòb. Pensi que los musulmans tenon lo dreit de pregar dins de polits endreits. Mas coma patriòta occitan, pensi que lo país nòstre a d'autras prioritats emai se la construccion d'una mosqueta es quicòm de respectable e indispensable.
FIn finala, a Occitània, li caldriá:
- Lo budgèt dels USA
- Un estat independent
E amb aquò seriam uroses ?
...
#5 Ges de problèma. Evidentament qu'as lo drech de pas veire d'argent public investit / gastat dins aquesta mena de bastiment.
Pasmens, podem pas au còp demandar ai gents que son musulmans de s'alargar de la pratica clandestina e fòra de controròtle dins de cafotches, tala que se presica l'Islam encuei a Marselha ( mai de 200000 musulmans e ges de mosqueta !) e pas li donar lei mejans de viure sa religion tan coma leis autres creseires.
E pensi pas que siegon lei mesmei linhas budgetaris que per lo desvolopament de l'occitan coma que vague. L'un se fa pas en remplaçament de l'autre. Evidement, ieu tanben m'agradaria mièlhs que se bastigue un Ostau de la cultura occitana a Marselha puslèu qu'una Mosqueta ò una catedrala, mai bota, vau pas demandar nimai de desbastir l'un per faire l'autre.
#2
As rason: o confessi: tèni problèmas amb lo tipe de construccion, es a dire un edifici religiós gigantàs, pagat parcialament amb moneda publica. L'article parlava d'una mosqueta, pas d'un centre comercial o d'un casino. Doncas faguèri mas remarcas sus la mosqueta.
Ara, coma pensi pas èsser completament colhon, comprèni que çò qu'ensajas de me dire sens o gausar far es que benlèu seriái irritat per la construccion d'un temple musulman.
E te respondrai francament òc! Te va plan atal ? E se lo jornalet nos aviá parlat de la Sagrada Família a Barcelona, auriái reagit çò meteis.
Soi contra las facilitats que los poders publics d'ocupacion francimanda en Occitània balhan a çò religiós quand son pas fotuts de donar moneda per desvolopar la nòstra lenga.
Doncas disi clarament, que metre de moneda per una mosqueta en Occitània deu pas èsser la prioritat en Occitània
Es mon dreit absolut e respectable de pensar que per ieu lo finançament d'un centre religiós deuriá arribar sonque se demòra moneda, aprèp aver finançat los mejans necessaris per l'occitan.
E que la justícia se mescle d'aquò, aquò me fa rire jaune. Es aquesta meteissa justícia franchimanda que proïbèt la pausa de panèus en occitan a Vilanòva de Magalona! E fasián pas 25 m de naut!
E darrièr tas linhas, sentissi lo fumet d'acusacion islamofobia. Te rassegurarai: soi estat maridat amb una musulmana (non practicanta) pro de temps per pensar o pas èsser.
Te daissi lo dreit d'èsser content amb aquesta mosqueta marselhesa. Es tanben una conviccion repectable d'aimar aquesta mena de construccion coma tu o aimas.
#3 Visca la Mosqueta de Marselha! Aquò's una bòna nòva per anar vèrs l'estabilizacion e la normalitat d'un islam occitan.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari