Un òme de 28 ans residissent a Niça es estat condemnat a tres meses de preson per insultar la familha princièra de Mónegue. La pena es superiora a la demanda del ministèri public, que demandava per l’acusat una multa de 1000 èuros, segon çò que rapòrta France TV Info.
 
Dins lo jutjament, que se passèt dimars passat, l’òme evoquèt un “malentendut” e assegurèt qu’el insultèt pas lo prince. Pasmens convenquèt pas la justícia monegasca.
 
Los faches se passèron la setmana passada quand l’òme se trobava dins un annèxe del palais de justícia monegasc, en tot cercar lo servici dels accidents del trabalh. Segon l’acusacion, lo condemnat lancèt de menaças en apercebent un aparitor, e quand l’emplegat li demandèt que se calmèsse, l’acusat auriá contunhat en insultant de manièra vulgara lo prince e la familha princièra. Alavetz avertiguèron la polícia e l’òme foguèt interpelat e plaçat en gàrdia a vista.