Se faguèt dimars passat a la sedença de l’ÒNU de Nòva York, una nòva Reünion sus lo Clima. I assistiguèron pas solament de governants, mas tanben de representants de grandas entrepresas, d’expèrts e de membres d’organizacions socialas de tot lo Mond per ensajar d’accelerar un acòrdi politic de lucha contra l'ecalfament mondial. Per far prene consciéncia del grèu problèma del cambiament climatic, qu’es ja la causa de mai de refugiats que los conflictes armats, l’Organizacion Meteorologica Mondiala (WMO) a publicat un dotzenat de vidèos en pronosticant cossí serà un bulletin meteorologic televisiu en 2050.
 
I a la prevision del temps del 23 de setembre de 2050 en Japon, per exemple, afectat per una previsibla ondada de calor que farà pojar la temperatura fins a 35 grases. I a tanben las d’Alemanha, Belgica, Brasil, Bulgaria, Burkina Faso, Danemarc, los Estats Units, las illas Filipinas, Islàndia, Sud-Africa, Tanzania e Zambia.
 
L’iniciativa de la WMO, amb la collaboracion de meteorològs de totes aqueles païses, a per tòca de mostrar las consequéncias irreversiblas d’una aumentacion de temperatura de mai de dos grases sus la Tèrra se se redutz pas d'entre lo 40% e lo 70% las emissions de gases d’efièch de sarra al mitan del sègle XXI.