En lo darrèr encontre deu grop D, l’equipa de França afrontava ger ser l’equipa de Suècia ja eliminada de la competicion. Mes lo fotbòl ei tot prumèr una question de motivacion e d’envèja e ad aqueth jòc los francés son estats despassats tot au long de la partida per lors adversaris.

Après un prumèr periòde de maishanta qualitat, los francés an pas sabut pujar lo nivèu en segon periòde. Sordeish, Suècia a obèrt la marca abans l’òra de jòc per una represa faraminosa d’Ibrahimovic, qu’ei per lo moment lo gol mei polit d’aqueth Euro. Batuda suu plan fisic, mentau e tecnic, l’Equipa de França contunhava de subir per préner un dusau gòl en las darrèras minutas, inscriut per Larsson. Una victòria 2-0 d’aunor per Suècia e sons suportaires qui deishan l’Euro caplhevat.

França, qualificada mercés a la victòria d’Anglatèrra contra Ucraïna 1 a 0, acaba fin finala dusau deu grop D e encontrarà donc Espanha en quarts de finala. La partida d’aqueste ser balha pas grana ilusion de qualificacion per los francés qui se deveràn engatjar mei per esperar bàter los campions en títol.

L’autre quart opausarà donc Anglatèrra a Itàlia, un encontre qui sembla mei equilibrat.




Matieu Casanòva