Las doas organizacions s’acòrdan per metre la Lista de Gaza jol contraròtle de l’Autoritat Nacionala Palestiniana. I a 108 000 personas sens ostal e 18 000 abitanças destruchas. Lo dos grops reïtèran l’objectiu d’un estat palestinian amb las frontièras de 1967.

Las organizacions palestinianas Hamas e Fatah anoncièron dijòus passat un acòrdi coma qué l’Autoritat Nacionala Palestiniana recuperarà lo contraròtle —perdut en 2007— sus la Lista de Gaza. Lo pache fixa coma “prioritat maximala” la reconstruccion de Gaza après los atacs israelians de julhet e d’agost dins l’encastre de l’Operacion Marge Protector, que costèt la vida de 2131 palestinians e a 71 israelians. Per aquò far, las doas organizacions demandan la dobertura de “totes los passatges frontalièrs” de Gaza.
 
L’acòrdi arribèt cinc meses après un autre pache entre l’Hamàs e lo Fatah, coma qué las doas organizacions s’engatjavan a establir un govèrn d’unitat nacionala palestinian. Nationalia expliquèt qualques claus per comprene lo perqué.
 
Segon de donadas del Burèu de las Nacions Unidas per la Coordinacion dels Afars Umanitaris (OCHA), al començament de setembre i aviá 110 000 desplaçats intèrnes en Gaza que vivián dins de refugis o d’ostals d’autras personas. 18 000 abitanças son destruchas, amb 108 000 personas sens ostal. I a 450 000 personas sens accès al ret municipal d’aiga.
 
Per afrontar aqueles besonhs, l’acòrdi entre lo Fatah e l’Hamas demanda que se convòque una conferéncia internacionala de donadors lo 12 d’octòbre que ven. Las doas organizacions reclaman al govèrn palestinian de priorizar “la reconstruccion d’ostals, escòlas e espitals”.
 
 
Un estat independent dins las frontièras de 1967
 
A respècte de l’autodeterminacion palestiniana, lo pache soslinha que la tòca es l’obtencion d’un estat independent amb las frontièras de 1967. Es a dire, constituit per las actualas Cisjordania e Gaza, amb Jerusalèm Èst coma capitala. Aiçò implicariá lo desmantelament de las colònias israelianas e la demolicion del mur que daissa al costat israelian gaireben lo 10% del territòri cisjordan, en i comprenent Jerusalem tota e las principalas colònias.
 
L’Hamas, que s’èra opausat tradicionalament a acceptar una Palestina formada solament de Cisjordania e Gaza, a adocit sa posicion long de las darrièras annadas.
 
 
 
 
 
 
 
Aquesta nòva es adaptada del jornal catalan Nationalia, amb qui Jornalet a un acòrdi de cooperacion.