Amb 35 000 manifestants segon l’organizacion, e 13 000 segon la polícia, los partits e associacions convocants de la protèsta an mostrat lo sosten popular al retorn del Léger Atlantic en Bretanha. Es un incontestable succès per aquela manifestacion —la tresena d’ongan— organizada per la reünificacion de Bretanha, segon çò que rapòrta Breizh Info.
 
Es aital que, pel tresen còp aqueste 2014, d’entitats e de partits an convocat los bretons a Nantas per reclamar una Bretanha reünificada. Es a dire, amb lo retorn dins Bretanha del departament del Léger Atlantic —qu’a l’ora d’ara aperten a la region del Païses de Léger—. Coma d’abitud, las organizacions Bretanha Unida e 44=Breizh e los partits Union Democratica Bretona e Partit Breton cridèron a una manifestacion “amb cinc còps mai de manifestants” qu’en las escasenças precedentas. E capitèron ben.
 
La manifestacion comencèt a 15h30 darrièr una bandieròla que proclamava “Sèm una nacion”. De fach s’agís d’una “manifestacion sens precedents”, coma declarèt Jean-François Le Bihan, president de Bretanha Unida. De son costat, lo cantaire Alan Stivell declarèt que i participèt “per defendre la Bretanha que va desparéisser”.
 
Las associacions e los partits favorables a la reünificacion de Bretanha vòlon metre la question dins l’agenda dels deputats e senators de la Republica Francesa que, aquesta tardor, lor cal reprene los debats —en començant pel Senat— sus la reorganizacion territoriala de l’estat. Aquela reorganizacion es fòrça controvertida, non solament en Bretanha mas tanben en Alsàcia, en Catalonha Nòrd e en Savòia.
 
 
Los normands son contents
 
Un jorn abans aquela manifestacion, se celebrèt en la vesina Normandia la segonda Fèsta dels Normands, Los festejaires ongan èran contents perque lor revendicacion de reünificacion de Normandia se farà amb l’union de la Nauta e de la Bassa Normandia, coma o prepausa la futura reorganizacion territoriala francesa.