L'emblematica plaça Tahrir del Caire, epicentre de la revòlta en Egipte, es  estada tornarmai l'endrech de las protèstas contra los militars. S'i son acampats de joves en favor de la democracia e de seguidors dels Fraires Musulmans, qu'an apelat a la mobilizacion contra l'abús de poder dels militars que governan lo país.

 

En tot esperar lo resultat definitiu de las eleccions, los militars an dissolvut lo Parlament e an pres lo poder legislatiu. S'an tanben reservat totas las decisions que pertòcan l'armada, lo nomenament del ministre de la defensa e lo budgèt destinat a eles contunharà d'èsser secrèt.

 

Dins aqueste scenari de protèsta, l'èx-president Hosni Mubarak es estat victima d'un atac cerebral, segon an anonciat arser los mèdias d'estat.

Lo 2 de junh, Hosni Mubarak foguèt condemnat a prepetuitat, acusat dels centenats de mòrts que i aguèt dins la plaça Tahrir del Caire pendent las revòltas que l'obliguèron a renonciar. Dins la preson, los mètges an ensajat lo suenhar d'urgéncia d'un infart cerebral e d'un arrèst cardiorespiratòri. Doas oras après, en vesent que la siá santat melhorava pas, los mètges de la preson l'an mandat a un espital militar, ont es estat declarat clinicament mòrt. Ça que la, de fonts de la seguretat egipciana dison que Mubarak es inconscient amb respiracion artificiala.