En escasença del Jorn Maritim Mondial, lo 25 de setembre passat, lo sit del mèdia qatarita Al Jazira a mes en foncionament un web interactiu espectaclós que permet de descobrir, tot en jogant, los innombrables afars de la pesca illegala long de las còstas de l’Africa occidentala, una de las zònas mai pauras de la planeta. A travèrs del jòc Pirate Fishing, lo portal de la cadena d’informacions prepausa als internautas de far lo jornalista de recèrca e d’amassar d’indicis e de nòtas per far un rapòrt sus “lo crime environamental que representa la pesca illegala en Sierra Leone, un crime que pana a de milions de personas necessitosas una importanta font de proteïnas”.
 
Lo tèma causit per Al Jazira per experimentar la dicha “ludificacion” (lo tractament ludic) se basa sus un reportatge aprigondit de la jornalista Juliana Ruhfus entitolat Pirate Fishing, que publiquèt fa dos ans dins lo programa People & Power de la cadena qatarita: “Lo jornalisme d’investigacion se pòt veire coma una causa d’intellectuals, del temps que la «ludificacion» lo pòt dobrir a una nòva generacion de jornalistas digitals”.
 
Doncas, aquel esplech met l’enfasi sul foncionament del jornalisme d’investigacion: “lo jòc soslinha cossí se redigís las nòvas e los passes necites per portar la qualitat a l’informacion. Sèm fòrça contents de la responsa qu’avèm aguda fins ara”, çò disiá Ruhfus dins la presentacion.