Ièr a sèt oras del ser, lo govèrn de la Generalitat de Catalonha presentèt lo Libre blanc de la transicion nacionala en Catalonha. Presentèron lo libre lo president del Conselh Assessor de la Transicion Nacionala (CATN), Carles Viver Pi-Sunyer, e lo president de la Generalitat, Artur Mas. Amb aquel libre, de mai de 1300 paginas, lo govèrn catalan assumís lo prètzfach prepausat pel CATN. Aquel organisme a fach en un an dètz e uèch rapòrts que dins lo libre s’acompanharàn d’una sintèsi.
 
Aqueles rapòrts se centran basicament sus tres seccions: cossí far la transicion de comunautat autonòma a estat, quinas estructuras d’estat caldrà crear e cossí pòt èsser la relacion de Catalonha amb Espanha, amb l’Union Europèa e amb la comunautat internacionala.
 
Lo CATN foguèt creat amb la foncion de conselhar la Generalitat sus las grandas questions aue pertòcan lo procès d’independéncia del Principat, e a fach cinquanta cinc reünions plenièras. Cap dels membres del conselh es pas pagat pel fach de ne far partida.
 
La setmana passada lo president Mas demandèt als sieus membres de contunhar de ne far partida, après aver acabat lo trabalh principal amb aquel Libre blanc.