Hong Kong se levèt ièr diluns de manièra extraordinària. Las autoestradas, que normalament son plenas, èran vuèjas de veituras. De milièrs de manifestants ocupèron dimenge lo centre vila en desfisant la polícia qu’ensagèt de los dispersar. Mantes an dormit pendent de nuèches per carrièras en empedissent que la vila torne a la normalitat. Los manifestants, convocats pel collectiu Occupy Central, exigisson que las autoritats de Pequin ajan pas lo darrièr mot sus qui deu èsser lo president d’aquela region autonòma.
 
La protèsta a crescut dempuèi qu’a la fin d’agost se saupèt que China permetriá l’eleccion dirècta del president autonomic, mas se reservava lo drech de dire qual ne podiá èsser candidat e qual non. Los organizaires de la protèsta avián ja fach en junh passat un referendum sus la question: un referendum non reconegut per las autoritats, que i participèron 800 000 personas, una cinquena part de la lista electorala.
 
Los manifestants ocupèron dimenge una bona part del centre vila, mai que mai a l’entorn del Pargue Tamar, ont foguèron durament atacats per la polícia. Ièr los manifestants ocupèron sustot l’airal de Mong Kok. Uèi an previst de persistir.