L’airal mediterranèu de Lengadòc a viscut al començament d’aquesta setmana de fòrtas pluèjas e d’inondacions, amb de desenats d’estradas talhadas, d’inondacions en mantas vilas e de rius desbordats. Los trens son estats immobilizats sustot dins las estacions, mas tanben qualques unes sul percors amb mai de 1100 personas dedins. Lo prefècte de la region de Lengadòc-Roselhon, Philippe de Bousquet, diguèt als mèdias que 300 pompièrs se son mobilizats. De Bousquet faguèt tanben una crida per que lo mond demorèsson dins lors abitanças.
 
De son costat, lo cònsol de Montpelhièr, Philippe Saurel, diguèt que se tendriá las escòlas dobèrtas per aculhir los escolans que poguèsson pas tornar a l’ostal. Fins a ièr de matin s’èra tenguda l’alèrta roja en Montpelhierenc e dins los païses de l’entorn.
 
L’estat francés va plaçar “un seissantenat de comunas” en “estat de catastròfa naturala”, segon çò qu’anoncièt lo ministre francés de l’interior Bernard Cazeneuve ièr sus RTL, çò rapòrta Midi Libre.
 
Segon Méteo France, en Montpelhierenc son tombats fins a 220 litres de pluèja per mètre cairat. Pasmens, dins tot Lengadòc las pluèjas son estadas intensas, e se desplaçan vèrs Provença.