La suspension que lo Tribunal Constitucional espanhòl fa del referendum consultatiu d’independéncia de Catalonha a creat un fum de reaccions en Catalonha e Aran. Arser, d’acamps de protèsta se debanèron davant totas las comunas del país, e en Aran sus la Plaça de la Glèisa de Vielha. Los manifestants, convocats per l’Assemblada Nacionala Catalana (ANC) e d’autras associacions de la societat civila, e amb lo sosten dels partits que sostenon lo vòte, decidiguèron de desobesir a la suspension e de començar de lor costat la campanha electorala per promòure lo vòte favorable a l’independéncia. En escasença d’aquela protèsta, l’ANC comencèt una campanha politica considerada la mai granda de l’istòria d’Euròpa, amb cent mila benevòls que vesitaràn totes los ostals de Catalonha en demandar lo vòte per l’independéncia del país, “una campanha festiva, estrambordanta e decidida, qu’engatge totes los ciutadans a bastir país nòu, un nòu estat democratic”.
 
D’un autre costat, los sindicats d’estudiants an convocat una cauma de protèsta los 7 e 8 d’octòbre jos lo lèma “voidem las salas d’estudi, empliscam las urnas”.
 
Tanben s’es debanada una campanha de protèsta artistica qu’a installat per tot lo país d’urnas mesas dins una gàbia.
 
Pereu se son debanadas de manifestacions dins las autras vilas dels Païses Catalans, especialament a Valéncia, Palma de Malhòrca e Perpinhan.
 
 
Lo Govèrn d’Aran a aprovat una mocion per sosténer lo vòte
 
Lo Conselh General d’Aran aprovèt ièr, a l’unanimitat, una mocion de sosten a la celebracion del referendum consultatiu d’independéncia de Catalonha. “Damb aguesta mocion, volem ratificar çò que ja s’aprovèc unanimament per CDA-PNA, UA-PM-PSC e PRAG, en Plen deth Conselh Generau d’Aran deth 29 d’octobre deth 2012, en tot arreconéisher tanben eth dret a decidir deth pòble aranés”, çò declarèt lo Sindic d’Aran, Carlos Barrera.