Libertat crida a manifestar a Pau lo 17 d’octòbre a 8h45, davant lo tribunal de la vila, “fàcia a la hurguèra politica orquestrada per l’estat francés”, mentre qu’un militant lai serà jutjat, segon çò que rapòrta La Setmana.
 
Lo movement aviá fach circular de prospèctes defendent las Calandretas, en seguida de la menaça de barrar la Calandreta d’Artics (Bearn) e de la manifestacion de sosten a l’escòla occitana que se passèt a Pau en febrièr passat. Dins aquelas fuèlhas, Libertat qualificava lo prefècte del departament de “persona mespresabla, qui ageish de manièra desleiau”.
 
 
Tres meses de secutament policièr
 
Fa tres meses que lo movement occitan d’esquèrra revolucionària patís una ofensiva policièra sens precedents. De militants son estats convocats cinc còps per la polícia, en mai del que serà jutjat. Acusan la comuna de Pau e las autoritats departamentalas de cercar, e quitament de provocar, los mendres pretèxtes per barrar la Tor deu Borrèu, al quartièr del Hedars, a Pau (Bearn), qu’es lo local social de Libertat.
 
De fach, lo 21 de junh passat, la Fèsta de la Musica s’acabèt ailà amb de susmautas. La polícia metèt fin d’una faiçon plan violenta als concèrts que s’i debanavan. Aquela accion policièra, segon la còla de Libertat, poiriá èsser premeditada per criminalizar l’esquèrra occitanista. Segon la version oficiala, la polícia demandèt d’arrestar los concèrts a 1 ora, e a 2 oras un trentenat de policièrs intervenguèron per metre fin a la fèsta. Mas segon la version de l’organizacion, de policièrs de divèrses còrses (municipala, nacionala, CRS e BAC) faguèron irrupcion quand lo darrièr grop acabava de jogar, en tustar lo material dels grops, en ensajant aital d’aturar la musica e en lançant de gases lacrimogèns e de flashballs abans que lo mond reagiguèsson. Lo mond respondèron sul pic a l’agression e se descadenèt la violéncia. Aqueles escambis violents s’acabèron amb la preson ferma per doas personas e amb de sosta per doas autras.
 
 
Comitat de sosten
 
S’es creat un comitat de sosten amb la tòca de federar e d’organizar la resisténcia. “Qu’insistim suu hèit que tot aquò ei politic, la nosta defensa que’n serà tanben”, çò dison. Aqueste comitat s’amassarà divendres que ven a 19h al Complèxe de la Republica de Pau, dins la sala 607.