Los 25 e 26 d’octòbre s’es previst un grand recampament dins la zòna umida del Testet, al bòsc de Sivens (Galhaqués), per sosténer las mobilizacions que, malgrat la fòrta repression policièra, resistisson d’un biais eroïc. Contunhan las mobilizacions, que dempuèi novembre passat resistisson contra lo projècte d’una restanca dins la zòna mentre que lo chantièr entamena la segonda fasa dels trabalhs.
 
En esperant aquela manifestacion, un collectiu de Tolosa crida a s’acampar l’11 d’octòbre a 11h sus la plaça de Sant Estève per organizar de comitats occitans, per menar d’accions localas e tanben per organizar la participacion al recampament de Sivens. Endacòm mai tanben son a organizar de comitats occitans.
 
 
Lo projècte
 
La restanca prevista, d’un milion e mièg de mètres cubes d’aiga, negarà una part de la Val de Tescon, en tot far desaparéisser 13 ectaras de zòna umida e en fasent desaparéisser un milion d’animals salvatges (de granhòtas, de peisses o de salamandras). Lo conselh general de Tarn cita lo Ministèri francés de l’Environament, segon lo qual la restanca auriá de vertuts ecologicas, cercant un “equilibri idrologic” de la zòna, çò que los ecologistas creson pas. S’opausan al projècte e denóncian qu’es finançat per de fonzes publics per favorir solament d’interèsses privats.
 
Aquel collectiu emplegan lo tèrme francitan bouilles, en definir ansin los bolhasses coma “de tèrras o pradas umidas sens valor financièra”, en tot ne revendicar lor preservacion, e tanben de totas las 35 ectaras de zòna umida menaçadas per la restanca. Denóncian que la tòca del projècte es de favorizar l’agricultura intensiva e que, per tant, es un perilh per un centenat d’espècias “protegidas” dont cinc son ja declaradas menaçadas.
 
Cridan d’individús, de comitats, de collectius e d’autras fòrças de resisténcia a organizar d’accions descentralizadas al ras de las entrepresas e las institucions engatjadas dins lo projècte de restanca: CACG, Ador-Garona, conselhs generals de Tarn e de Tarn e Garona e tanben las prefecturas, lo Ministèri de l’Ecologia, las comunautats europèas, etc.
 
Lo collectiu ensajan de tornar abitar la zòna per empedir la construccion de la restanca. Declaran que lor “resisténcia es dinamica e creativa” e que luchan “contra un sistèma de las idèas e de las practicas, mas dins cap de cas contra d’individús”.