Lo Parlament de Catalonha faguèt dimècres passat lo primièr acte de desobesissença politica al Tribunal Constitucional espanhòl, qu’aviá mes en suspens lo referendum consultatiu del 9 de novembre que ven (“lo 9-N”) sus l’avenir de Catalonha e Aran. La cambra catalana elegiguèt los membres de la comission de contraròtle del referendum. Los partits espanholistas (PP, PSC e Ciutadans), ensagèron d’empedir lo vòte, mas los partits favorables a la consulta (CIU, ÈRC, ICV-EUIA e CUP) metèron en evidéncia que lo Parlament deviá respondre a la demanda democratica del pòble catalan.
 
Los membres de la comission de contraròtle foguèron elegits per 86 vòtes en favor e pas cap contra, perque los deputats dels tres partits espanholistas decidiguèron de participar pas. Segon eles, aquel vòte èra una aplicacion de la Lei de las Consultas, suspenduda pel Tribunal Constitucional, e èra un acte de desobesissença. Lo PP menacèt de portar totes los participants a la justícia, e raportèt l’acte parlamentari al ministèri public. Ciudatans quitèt la sala en menaçant los que demoravan amb las “consequéncias” que deurián afrontar.
 
 
De menaças del govèrn espanhòl
 
De son costat, la delegada del govèrn espanhòl en Catalonha, María de los Llanos de Luna Tobarra, diguèt ièr que lo burèu de l’avocat general de l’estat espanhòl es a estudiar las accions del Parlament catalan e prendrà de mesuras “per recuperar la legalitat e far complir la suspension decretada”.
 
 
Cima dels partits favorables al referendum
 
Uèi se debana una amassada dels representants dels partits favorables al vòte del 9 de novembre, amb lo president Artur Mas, per s’acordar sus l’estrategia après la suspension del Tribunal Constitucional espanhòl.
 
Mentretant, las protèstas contunhan tanben per carrièras, e los estudiants son en cauma.
 

 
 

'Acatarem la nostra democràcia'per vilawebtv . Los representants dels partits favorables al referendum expausan lors motius per desobesir al Tribunal Constitucional