Lo Parlament de Catalonha aprovèt, per 112 vòtes en favor e 18 contra,  la Lei del Drech de las Personas Gais, Lesbianas, Bisexualas e Transexualas e per l’Eradicacion de l’Omofobia, la Lesbofobia e la Transfobia. Es una de las primièras lei del Mond que prevei de multas contra las discriminacions o las violéncias —fisicas o verbalas— contra aquel collectiu.
 
La lei aprovada a lo sosten dels collectius LGBT del país e cèrca d’eradicar las situacions de discriminacion e violéncia, e de facilitar la participacion e la representacion de las personas LGBT dins totes los domenis de la vida sociala. Entre diferents ponches, protegís l’integritat, la dignitat e la libertat d’aquelas personas; crèa lo conselh nacional de las lesbianas, gais, bisexuals, transexuals e intersexuals coma organ consultatiu de las administracions: es un organ per coordenar l’execucion de las politicas adreiçadas al collectiu, e un servici d’atencion integrala per respondre a las situacions de violéncia e discriminacion. Refortís tanben las politicas de lucha contra la discriminacion dins las escòlas en regulant, entretant, que los materials escolars prengan en compte las divèrsas orientacions sexualas.
 
Lo Partit Popular demorèt tot sol en votant contra la nòrma e en argumentant qu’èra pas necessària bòrd que discriminava lo collectiu LGBT. Al delà, los deputats d’Union Democratica de Catalonha votèron diferentament de Convergéncia Democratica de Catalonha, e mai s’aqueles dos partits son companhs dedins la coalicion CIU. Los d’Union votèron contra las sancions e las mesuras en l’educacion.