Sièis magistrats del Tribunal Constitucional espanhòl an votat en favor de la legalizacion de Sortu e cinc o an fach contra. Lo partit basco de l’esquèrra independentista aviá fach una apelacion contra l’illegalizacion pel Tribunal Suprèm.

Lo Tribunal Constitucional espanhòl a legalitzat Sortu, sièis magistrats progressistas del tribunal an votat en favor e cinc (quatre conservadors e un progressista) an votat contra. Aital an resolgut lo recors qu’aviá presentat l’esquèrra abertzale contra l’illegalizacion que veniá del Tribunal Suprèm. Lo rapòrt votat uèi es estat elaborat per la magistrata Elisa Pérez Vela, qu’èra per la legalizacion.
 
L’esquèrra abertzale presentèt Sortu en febrièr, arunan, amb d’estatuts que deploravan la violéncia per fins politicas en i comprenent explicitament aquela d’ETA. Ça que la, un mes après, la justícia espanhòla illegalizava la formacion e li enebissiá de s’inscriure coma partit politic. Alavetz, Sortu poguèt pas concórrer a las eleccions municipalas, arunan, e lo partit basco es estat illegalizat fins ara.