Bearn, e Occitània tota, son encara en estat de chòc après la mòrt d’una jove maire lo 27 de setembre passat a l’espital d’Ortès. La femna, de 28 ans, intrèt per enfantar e la menèron d’urgéncia a la sala d’operacion per li practicar una cesarèa. Après l’anestesia patiguèt un arrèst cardiac e la menèron còp sec a l’espital de Pau qu’es melhor esquipat, mas ailà moriguèt. L’anestesista es estada mesa en examen e risca una pena de fins a cinc ans de preson. Ela reconeguèt sofrir de dependéncia a l’alcòl. Lo nenon es san e salve.
 
Aquel afar, que tot lo país ne parla, a relançat lo debat dels petits espitals locals al nivèl de tot l’estat. Son d’installacions benlèu caras mas preciosas localament, segon çò que rapòrta Sud-Ouest. Dempuèi 1970 las autoritats an accelerat los barraments dels petits espitals per reduire los còstes.
 
 
Manifestacion contra lo barrament de la maternitat
 
Qualques centenats de personas manifestèron dissabte per las carrièras d’Ortès per defendre la maternitat de la vila. L’agéncia regionala de la santat que voldriá barrar lo petit espital amb lo pretèxt de la tragèdia.
 
 
Problèmas d’acolisme demest los anestesistas
 
Segon çò que rapòrta l’AFP, lo Sindicat Estatal dels Practicians Espitalièrs Anestesistas-Reanimators Alargat (SNPHARE segon sa sigla en francés) afirma que i a una proporcion “non negligibla” d’anestesistas amb de problèmas d’alcòl pr’amor de “condicions de trabalh dificilas”.
 
Dins l’afar de la maternitat d’Ortès, la detenguda presentava una taxa d’alcòl de 2,40 gramas per litre de sang quand l’embarrèron après qu’ela se presentèt dimars passat davant los gendarmas. Aquò pròva pas que foguèsse ébria dins lo moment de l’intervencion, e mai se lo procuraire de Pau afirma que “non èra pas hens lo son estat normau pendent l’intervencion”. Lo paire de la detenguda, qu’es son avocat, afirma que res pròva pas que sa filha, diplomada en 1999 a Brussèlas, foguèsse alcolizada en aquel moment.