Actualitats
Rugbi XIII: los Sants tampan la pòrta del Paradís als Dracs
Avèm passat una novèla dimenjada a nos congostar d’atacas, de circulacion de pauma, d’ensages e de tampons caramelizats!
Alan Roch
Tròp fòrts los Sants
Dijòus, los Dracs catalans avián un novèl rendètz-vos amb l’istòria. Mas encara macats de la partida ganhada a Huddersfield, manquèron l’escasença. Dobriguèron plan la marca per Escarré mas lo farfadet, tocat a l’anca, abandonèt lèu sos companhs. E manquèt totjorn un pas, un placatge, una recepcion assegurada, una interpretacion arbitrala per poder contrar St Helens que prenguèt l’avantage just abans la pausa 10-6 sus un costat tampat. Tre la represa, un novèl ensag (l’arbitre demandèt pas la vidèo, mentre qu’un enabans de passa a la debuta de l’accion es mai que probable) complicat de la transformacion puèi d’una penalitat fasiá envolar los sòmis catalans: un ensag en fòrça del pilar Masoe e un ensag de “federala” (primièr atacant que trauca la defensa sus sortida de mesclanha) marquèt la superioritat de St Helens que lo darrièr ensag de Pomeroy, transformat per Tomàs Bòsc, capitèt pas a metre en dobte: 30-12. E de regrèts fins la debuta de la sason venenta!
Divendres, lo tenent del titol, Wigan, se deguèt emplegar fins a la darrièra minuta per batre, dins un revenge de la finala de l’an passat, los Lops de Warrington: 18-12 sus un ensag a trenta segondas de la còrna!
Dissabte, a 7 oras del vèspre (ora occitana), es doncas un grand classic que presenta la finala: St Helens-Wigan a Old Trafford (de seguir sus Be In Sports Max 4).
Los Lapinons escapan als Dògols
Dimenge, l’ANZ Stadium de Sydney èra plen coma un uòu (85 833 espectators: lo mai que se pòsque dintrar dins l’estadi; primièra audiéncia de l’an de la TV australiana non solament esportiva mas tanben de totas las emissions) per la finala d’NRL entre los Lapinons-Rabbitohs de South Sydney e los Dògols de Canterbury. Tre la primièra minuta, lo cap de Graham fasiá petar la pometa de Sam Burgess que va jogar tota la partida atal. Los Lapinons dominèron larjament lo primièr temps mas marquèron un sol ensag e una penalitat: 6-0 a la pausa. Los Dògols butassèron los Lapinons a la represa e tornèron a egalitat sus un ensag a la 50a minuta. Es alara que George Burgess faguèt una carga elefantesca que lo menèt entre los pals. Amb la transformacion, puèi una penalitat de Reynolds, los Lapinons fasián lo trauc: 14-6. Mas los Dògols ramosèron totas las fòrças per ensajar de faire capvirar lo sòrt de la partida. Mas Auva’a aplatussava un còp a pè de seguir dins lo recanton de la Tèrra Promesa (73a): la messa èra dita e l’afar plegat. Per confirmar la victòria, los Lapinons ajustavan dos ensages dins las doas darrièras minutas. La marca finala pugèt a 30-6 mas indica pas brica l’intensitat de la partida. Sam Burgess, en partença per Bath e lo XV d’Anglatèrra, s’encarguèt del recanton de transformar l’ensag d’Inglis, mas la pauma freguèt lo pal d’esquèrra (un que sap tot faire: los quinzistas pensan d’utilizar l’avant al pòst de centre). 43 ans que los Lapinons avián pas joslevat lo trofèu! E una partida a copar lo buf per marcar l’eveniment.
Lo Canari canta pas pel Singlar!
Al país, ne sèm ja a la quatrena jornada del Campionat d’Elèit 1; dissabte, los Dragonets anèron ganhar a Avinhon 26-12 e Tolosa se desbarrassèt de l’oposicion palauenca: 36-6. Limós aviá vist arribar tres australians que capitèron pas a sortir los Roge e Negre del trauc ont son enfangats: desfaita 48-10 a Vilanuèva. 22 punts pel sol Aurelian Decarnin: 2 ensages, 6 transformacions e 2 penalitats. Un biais de celebrar sa crida en esquipa de França pel Torneg europèu.
Dimenge, al Molin, èra l’ora de l’afrontament bèl entre los dos primièrs, complicat de la flaira gostosa dels dèrbis: FC Lesinhan contra AS Carcassona. Los Verd e Blancs enregistravan la dintrada de l’ancian Drac Jamal Fakir, que poguèt pas faire de miracles. D’entrada, Carcassona prenguèt lo jòc a son compte: dos ensages dins las dètz primièras minutas. Las cargas dels avants e la rapiditat dels tres quarts, lo tot orquestrat pel Maxim Gressèque, e l’addicion montèt, montèt, montèt: 26-2 a la pausa. Los vesitaires ajustèron tres ensages dins lo segond temps e lo jove alièr Alexis Escamilla i anèt de son còp del capèl. A la fin, los locals rendèron mai leugièra la nòta amb dos ensages: 38-12, nòta qu’auriá pogut èsser plan mai salada se los Jaune e Negre avián conegut una reüssida mai granda dins las transformacions: una sola ensacada sus 9!
Al programa de la dimenjada venenta: per dissabte: Vilanuèva-Lesinhan (19h); e per dimenge: Avinhon-Carcassona (15h15), Limós-Palau (15h15) e Dragonets-Tolosa (15h30).
Alan Roch
Dijòus, los Dracs catalans avián un novèl rendètz-vos amb l’istòria. Mas encara macats de la partida ganhada a Huddersfield, manquèron l’escasença. Dobriguèron plan la marca per Escarré mas lo farfadet, tocat a l’anca, abandonèt lèu sos companhs. E manquèt totjorn un pas, un placatge, una recepcion assegurada, una interpretacion arbitrala per poder contrar St Helens que prenguèt l’avantage just abans la pausa 10-6 sus un costat tampat. Tre la represa, un novèl ensag (l’arbitre demandèt pas la vidèo, mentre qu’un enabans de passa a la debuta de l’accion es mai que probable) complicat de la transformacion puèi d’una penalitat fasiá envolar los sòmis catalans: un ensag en fòrça del pilar Masoe e un ensag de “federala” (primièr atacant que trauca la defensa sus sortida de mesclanha) marquèt la superioritat de St Helens que lo darrièr ensag de Pomeroy, transformat per Tomàs Bòsc, capitèt pas a metre en dobte: 30-12. E de regrèts fins la debuta de la sason venenta!
Divendres, lo tenent del titol, Wigan, se deguèt emplegar fins a la darrièra minuta per batre, dins un revenge de la finala de l’an passat, los Lops de Warrington: 18-12 sus un ensag a trenta segondas de la còrna!
Dissabte, a 7 oras del vèspre (ora occitana), es doncas un grand classic que presenta la finala: St Helens-Wigan a Old Trafford (de seguir sus Be In Sports Max 4).
Los Lapinons escapan als Dògols
Dimenge, l’ANZ Stadium de Sydney èra plen coma un uòu (85 833 espectators: lo mai que se pòsque dintrar dins l’estadi; primièra audiéncia de l’an de la TV australiana non solament esportiva mas tanben de totas las emissions) per la finala d’NRL entre los Lapinons-Rabbitohs de South Sydney e los Dògols de Canterbury. Tre la primièra minuta, lo cap de Graham fasiá petar la pometa de Sam Burgess que va jogar tota la partida atal. Los Lapinons dominèron larjament lo primièr temps mas marquèron un sol ensag e una penalitat: 6-0 a la pausa. Los Dògols butassèron los Lapinons a la represa e tornèron a egalitat sus un ensag a la 50a minuta. Es alara que George Burgess faguèt una carga elefantesca que lo menèt entre los pals. Amb la transformacion, puèi una penalitat de Reynolds, los Lapinons fasián lo trauc: 14-6. Mas los Dògols ramosèron totas las fòrças per ensajar de faire capvirar lo sòrt de la partida. Mas Auva’a aplatussava un còp a pè de seguir dins lo recanton de la Tèrra Promesa (73a): la messa èra dita e l’afar plegat. Per confirmar la victòria, los Lapinons ajustavan dos ensages dins las doas darrièras minutas. La marca finala pugèt a 30-6 mas indica pas brica l’intensitat de la partida. Sam Burgess, en partença per Bath e lo XV d’Anglatèrra, s’encarguèt del recanton de transformar l’ensag d’Inglis, mas la pauma freguèt lo pal d’esquèrra (un que sap tot faire: los quinzistas pensan d’utilizar l’avant al pòst de centre). 43 ans que los Lapinons avián pas joslevat lo trofèu! E una partida a copar lo buf per marcar l’eveniment.
Lo Canari canta pas pel Singlar!
Al país, ne sèm ja a la quatrena jornada del Campionat d’Elèit 1; dissabte, los Dragonets anèron ganhar a Avinhon 26-12 e Tolosa se desbarrassèt de l’oposicion palauenca: 36-6. Limós aviá vist arribar tres australians que capitèron pas a sortir los Roge e Negre del trauc ont son enfangats: desfaita 48-10 a Vilanuèva. 22 punts pel sol Aurelian Decarnin: 2 ensages, 6 transformacions e 2 penalitats. Un biais de celebrar sa crida en esquipa de França pel Torneg europèu.
Dimenge, al Molin, èra l’ora de l’afrontament bèl entre los dos primièrs, complicat de la flaira gostosa dels dèrbis: FC Lesinhan contra AS Carcassona. Los Verd e Blancs enregistravan la dintrada de l’ancian Drac Jamal Fakir, que poguèt pas faire de miracles. D’entrada, Carcassona prenguèt lo jòc a son compte: dos ensages dins las dètz primièras minutas. Las cargas dels avants e la rapiditat dels tres quarts, lo tot orquestrat pel Maxim Gressèque, e l’addicion montèt, montèt, montèt: 26-2 a la pausa. Los vesitaires ajustèron tres ensages dins lo segond temps e lo jove alièr Alexis Escamilla i anèt de son còp del capèl. A la fin, los locals rendèron mai leugièra la nòta amb dos ensages: 38-12, nòta qu’auriá pogut èsser plan mai salada se los Jaune e Negre avián conegut una reüssida mai granda dins las transformacions: una sola ensacada sus 9!
Al programa de la dimenjada venenta: per dissabte: Vilanuèva-Lesinhan (19h); e per dimenge: Avinhon-Carcassona (15h15), Limós-Palau (15h15) e Dragonets-Tolosa (15h30).
Alan Roch
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
I a pas cap de comentari
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari