Lo país de Monpelhierenc es estat tornarmai victima dels aigats al començament d’aquesta setmana. Diluns de ser, aperaquí 300 personas foguèron refugiadas dins de gimnasis de la perifèria nòrd de Montpelhièr, en seguida d’auratges violents seguits d’inondacions. Segon los secorses i a pas agut de victimas gràcias al brave trabalh dels pompièrs. Grabèls es estat la vila mai tocada, que l’aiga i a quitament desplaçat de veituras. Las crescudas dels flumes son seriosas, mai que mai aquelas de Les e de la Mauçon.
 
Aqueste ser las precipitacions son anadas cap a l’èst. De fach Monpelhierenc, las Garrigas e las Costièra de Nimes son en vigilància irange dempuèi diluns de ser.
 
Aquesta fin d’estiu e aquesta davalada, los aigats an provocat de grands damatges en Lengadòc. La nuèch del 17 al 18 de setembre, 4 personas moriguèron dins l’inondacion d’un camping als Banhs de la Maló (Espinosa), del temps qu’una autra persona moriguèt en Roergue, tanben a causa dels aigats. Diluns 29 de setembre, aperaquí 4000 personas de Montpelhierenc deguèron cercar refugi endacòm a causa de las inondacions.