Ara per ara i aurà pas de prospeccions de petròli e de gas dins lo Pargue Natural Regional de Leberon (País d’Ate e País d’Egues). La ministra francesa de l’ecologia, Ségolène Royal, anoncièt diluns passat qu’acordariá pas lo “permés exclusiu de recèrcas de minas d’idrocarburs liquids o gasoses”, un permés que l’aviá sollicitat la societat suedesa Tethys Oil AB. Aquela entrepresa voliá far de perforacions sus un airal de 870 quilomètres cairats, segon çò que rapòrta Le Monde.
 
Royal aital a escotat la votz del pòble, que refusèt massissament las prospeccions dins una consultacion publica que s’organizèt entre lo 19 de setembre e l’11 d’octòbre, dins las 77 comunas federadas per lo Pargue de Leberon. Lo burèu del pargue natural aviá tanplan adoptat una mocion de refús a l’unanimitat. Tanben una peticion en linha, encara dobèrta, amassa aperaquí 69 000 signaturas contra las prospeccions en Leberon.
 
Ça que la, Actu-Environnement considèra que la decision de la ministra pòt encara dobrir la via a una esplecha del gas de sistre.