Almens 28 còrses son estats exumats d’una fòssa comuna près d’Iguala, una comuna de l’estat de Guerrero al sud de Mexic. Los còrses, que mòstran de signes evidents de tortura, se placèron sus de brancas e de pètges; de gents i lancèron de combustible e los aluquèron, çò rapòrta Vilaweb en collaboracion amb Global Voices.
 
Aparentament, las victimas se moriguèron cremadas vivas, segon çò que diguèt al jornal El Mundo un gardian qu’èra sus plaça. Al total, i aviá 28 personas cremadas, coma sembla, e 34 sens que siá confirmat. Ara las autoritats fan d’analisis per conclure se las rèstas umanas son las dels 43 estudiants de pedagogia de la comunautat d’Ayotzinapa desapareguts lo 26 de setembre, quand lor autobús foguèt fusilhat per de policièrs e de membres del crime organizat. Segon las autoritats, l’identificacion de las victimas s’esperlongarà entre quinze jorns e dos meses e i participaràn de nòus especialistas argentins, a la demanda d’estudiants d’Ayotzinapa.
 
Iñaky Blanco, procuraire general de la justícia de l’estat de Guerrero, assegurèt que “qualques unes dels elements policièrs avián de ligams amb la delinquéncia organizada e, dins cèrts cases, se sabiá qu’èran de membres actius del narcotrafec”. De mai, dins una conferéncia de premsa a Acapulco, apondèt qu’un òme, Francisco Salgado Valladares, èra estat lo director de la seguretat publica d’Iguala, e es aquel òme qu’aviá fach arrestar los estudiants de l’Escòla Normala Rurala d’Ayotzinapa; puèi un individú nomenat El Chuky, del grop de bandits Guerreros Unidos, n’ordenèt lo raubatòri e l’assassinat.
 
Dins l’atac del 26 de setembre moriguèron tanben tres joves estudiantas, un jogaire de fotbòl —qu’anava amb un autre autobús tanben atacat—, lo menaire de l’autobús e una femna adulta qu’anava amb un taxi. Se sap pas ont son lo cònsol de la vila d’Iguala, José Luis Abarca, nimai lo secretari de la seguretat publica municipala.
 
E mai se se sap pas encara l’identitat dels còrses trobats, d’unes ja gausan assegurar que son los estudiants desapareguts, çò que significariá un grand còp pel govèrn, pr’amor que seriá dirèctament implicat en un chaple de civils desarmats.
 
Après se conéisser los faches, lo ret mexican s’empliguèt de reaccions, amb de messatges de dòl e quitament de cridas a contestar lo govèrn.
 
Cal dire qu’en 1996 lo governador de Guerrero, Rubén Figueroa Alcocer, aviá demissionat en seguida del masèl d’Aguas Blancas. Aquel meteis jorn, lo congrès de Guerrero designèt lo governador remplaçant fins a la fin de 1999.
 
Qualques usatgièrs an comentat tanben amb pessimisme l’estat de violéncia que s’i tròba somés lo país.
 
E circula una crida a una marcha nacionala de sosten als estudiants d’Ayotzinapa e a lors familhas, lo 8 d’octòbre, e de refús de la violéncia institucionalizada de Mexic.
 
Per de reaccions e de notícias sus aqueste afar, podètz seguir las etiquetas #Ayotzinapa, #AyotzinapaNoSeOlvida e #JusticiaParaAyotzinapa