La jove escolana e activista paquistanesa Malala Yusafzai es la ganhanta del Prèmi Nobel de la Patz de 2014. Es la persona mai jove qu’a obtengut aquel guierdon. La jurada n’a valorizat “la lucha contra la supression del drech dels enfants e dels joves de recebre una educacion”. Per la meteissa rason, en mai de Malala, es estat tanben premiat amb lo Nobel de la Patz, Kailash Satyarthi, un activista indian pels dreches dels enfants e contra l’esplecha infantila.
 
Malala Yusafzai recebèt ja lo Prèmi Internacional Catalonha d’arunan. En recebre lo guierdon, Malala Yusafzai reclamèt pas d’èsser remembrada coma la joventa atacada al fusilh pels talibans mas coma la que lucha pels dreches de l’educacion de totes, d’òmes e de femnas. “Mon messatge: esperetz pas que qualqu’un o faga, fasètz-o vosautres meteisses”, çò diguèt.
 
 
Lo drech a l’educacion de las dròllas en Paquistan
 
Lo 9 d’octòbre de 2012, la jove activista paquistanesa foguèt atacada al fusilh per un tiraire milician del Movement Taliban de Paquitsan (Tehrik-i-Taliban Pakistan, TTP), mentre que la gojata tornava de l’escòla en autobús. Demorèt ferida al cran e al còl e foguèt pas abans genièr de 2013 que los mètges la considerèron garida e que poguèt tornar a son escòla segondària de Birmingham.
 
L’atemptat contra la jove activista arribèt après qu’ela venguèsse famosa, a 13 ans, en escrivent un blòg per la BBC amb lo pseudonim Gul Makai; i criticava lo regim dels talibans, qu’avián obligat de barrar las escòlas privadas e enebit l’educacion de las dròllas. En 2009, Malala Yusafzai e son paire apareguèron dins un documentari de la BBC, Pèrda de classas: la mòrt de l’educacion de la femna, que i denonciavan la dificultat de las gojatas per estudiar.