Actualitats
Alsàcia manifèsta contra la reorganizacion territoriala francesa
Vint mila personas seguiguèron la crida de la plataforma L’Alsace Ma Région per protestar contra lo plan de fusionar lo país alemand amb las regions de Lorena e Champanha-Ardena
Doas setmanas après una autra manifestacion a Nantas en defensa de la reünificacion de Bretanha, Alsàcia a relevat las protèstas contra la proposicion de reorganizacion territoriala del govèrn francés. Faguèron una manifestacion contra lo plan de París d’integrar lo país germanofòn amb las regions de Lorena e Champanha-Ardena. Aperaquí 20 000 personas segon l’organizacion (7000 segon la polícia) manifestèron dissabte per carrièras a Estrasborg en seguissent la crida de la plataforma L’Alsace Ma Région (Alsàcia Ma Region).
Los manifestants diguèron “non a l’idèa d’una granda region ingovernabla qu’Alsàcia i demorariá diluida e òc a una Alsàcia unida e solidària que parteja de valors, un meteis biais de viure, un eiretatge cultural e un potencial economic”.
Lo mes passat, un grop de parlamentaris e d’elegits alsacians menèt a l’Elisi una peticion contra la fusion. Una peticion en linha amassèt près de 54 300 signaturas, mas lo primièr ministre francés, Manuel Valls, se mostrèt pas partisan “d’una Alsàcia replegada sus ela meteissa”.
Cal remembrar qu’en abril de 2013, los alsacians refusèron en referendum de fusionar lo Conselh Regional d’Alsàcia e los dos conselhs generals del Naut Ren e del Bas Ren en una sola collectivitat, lo Conselh d’Alsàcia.
Los manifestants diguèron “non a l’idèa d’una granda region ingovernabla qu’Alsàcia i demorariá diluida e òc a una Alsàcia unida e solidària que parteja de valors, un meteis biais de viure, un eiretatge cultural e un potencial economic”.
Lo mes passat, un grop de parlamentaris e d’elegits alsacians menèt a l’Elisi una peticion contra la fusion. Una peticion en linha amassèt près de 54 300 signaturas, mas lo primièr ministre francés, Manuel Valls, se mostrèt pas partisan “d’una Alsàcia replegada sus ela meteissa”.
Cal remembrar qu’en abril de 2013, los alsacians refusèron en referendum de fusionar lo Conselh Regional d’Alsàcia e los dos conselhs generals del Naut Ren e del Bas Ren en una sola collectivitat, lo Conselh d’Alsàcia.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
M'as pas completament citat ;) Se levas mon "tant pesugament" aquò cambia un pauc lo sens de la frasa. Lo fach d'insistir sus aquò es pas "tot simplament perqué es Alsàcia un país germanic", es una volontat de presentar aquò coma la question centrala de la mobilisacion, mentre qu'es pas verai. Aquesta mobilisacion es simplament una opausicion a una "reforma" purament administrativa, an ges de revendicacions culturalas, an pas demandat mai d'ensenhament deis dialectes o quau que siágue d'aquesta mena.
Pasmens, siáu en opausicion totala ambé la "reforma" dau PS tanben. Ai simplament dich que l'element cultural mi sembla pas estre aqui la question principala. E iéu tanben mon opausicion es per d'autrei rasons : faire creire que la fusion va automaticament faire d'economias es desoneste, e es en realitat un biais de faire passar discretament una dòsi de rigor de mai. Se li aviá una manif unitaria dei francés e de totei les tribus germanicas, contra la rigor e lo sacrifici dei colectivitats territorialas, auriá mon sostenh. Mai, dins aquesta manifestacion clafida d'UMPistes e caminant au costat de fascistes vertadièrs, ai pas l'impression qu'es lo cas.
Perqué sotalinhar la germanitat d'Alsàcia? Benlèu tot simplament perqué es Alsàcia un país germanic.
Perqué al nom de la "solidaritat" Alsàcia se deuriá trapar dins un daquòs administratiu qu'aurà pas trigat? Se deguèsse s'associar Alsàcia amb una autra entitat politica perqué pas amb lo land alemand de Baden-Württemberg fòrça mai ric qu'Alsàcia e que compartís amb ela la meteissa lenga e cultura alemanica?
Ah mas non! La solidaritat se deu far segons la tradicion francesa: lo diktat francista.
Perqué sotalinhar tant pesugament la germanitat d'Alsàcia ? Mosela tanben es d'origina alemanda (quitament se la colonisacion francesa deis alentors de Metz es fenida)
Es que lei enjuecs principaus sariá pas pusleu :
1) Una question de gerrymanding, ambé d'elegits de dreta que vòlon gardar son poder (e qu'aviam acceptat la fusion Alsàcia-Lorena, avanç l'apondon de Champanha),
2) La question de la solidaritat entre una region rica e una region paura (qu'es probablament una dei rasons mai importantas per l'unilateralitat d'aquest moviment, i.e. ges de manifestacions en Lorena) ?
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari