Los curds que combaton l’Estat Islamic a Kobanê demandan la dobertura de la frontièra per evacuar los civils. La vila se tròba dins l’estat sirian al bòrd de la frontièra amb l’estat turc, es entornejada pels jihadistas de l’Estat Islamic, e los abitants demandan l’intervencion de l’ÒNU e de la comunautat internacionala. Sabon que quand l’armada islamista prendrà la vila se produirà un masèl.
 
L’Estat Islamic es a assetjar la vila e es quitament intrat dins lo nuclèu urban, ont, en mai dels milicians curds que resistisson i a aperaquí 10 000 civils.
 
“Volèm que se dobrisca un corredor per evacuar los civils. Se l’Estat Islamic arriba al centre vila i aurà un chaple. La sola sortida es de reprene l’alen e d’obténer d’armas. Los bombardaments estatsunidencs son pas efectius. Fa 26 jorns que resistissèm. Volèm lo sosten de la comunautat internacionala e de l’ÒNU”, çò a dich Ismet Sheikh Hassat, cap dels curds de Kobanê.
 
Per ara Turquia refusa de dobrir la frontièra e de daissar sortir los civils, malgrat la pression dels curds del país, indignats pel genocidi que patisson lors fraires. Turquia voldriá evitar l’intrada de milicians curds —ja que Turquia los reprimís dempuèi longtemps— e espèra que los bombardaments estatsunidencs sián efectius. Mas las bombas grandas dels avions son pas brica eficaças. L’armada jihadista es fòrça leugièra e rapida, compausada qu’es per de petitas unitats d’infantariá.