Es començat lo procès del president del conselh general del departament de las Bocas del Ròse, èx-socialista, pel remandament arrenjat e indemnizat amb de fonzes publics d’un membre de son gabinet.

Ièr diluns se debanèt al tribunal correccional de Marselha lo primièr procès de Jean-Noël Guérini. Pendent la jornada, lo tribunal examinèt l’afar de corrupcion del president del conselh general del departament, segon çò que rapòrta Libération.
 
Lo tribunal examinèt pendent la jornada un afar de desviament de fonzes publics, la demission d’un collaborador transformada en licenciament per li permetre —çò pensa la justícia— de tocar l’argent e de se presentar a las eleccions. Mas en mai d’aquò, lo president èx-socialista e son fraire son suspèctes d’aver recebut de comissions dins de mercats publics e dins d’autorizacions de dobertura d’ostals de retirada.
 
Jean-Noël Guérini risca cinc ans de preson e cinc ans d’inelegibilitat. En cas que la justícia lo condemnèsse aquesta davalada, solament amb una apelacion se poiriá presentar a las cantonalas de març, e en contrapartida beneficiariá d’un relaxament.
 
 
Lo 2 d’abril passat, Guérini foguèt menat a l’espital pr’amor d’un malaise que se debanèt mentre qu’èra enquestat pels gendarmas. Lo president departamental aviá ja aguts de problèmas cardiacs al començament dels ans 2000. En genièr deviá èsser entendut pels gendarmas, mas son audicion foguèt reportada pr’amor d’una peritoniti que l’aviá ja menat a l’espital.