La finala de la Superliga e la cinquena jornada del campionat d’Elèit precedisson l’episòdi internacional amb lo Campionat Europèu e lo Torneg de las Quatre Nacions.

Un còp de punh de tròp
 
Aqueste dissabte, en fin de vèspre, mai de 70 000 espectators cantavan e brandissián de bandieretas dins Old Trafford. De fait, lo sòrt de la finala entre Wigan e St Helens se joguèt tre la segonda minuta. Intervencion a retardament del dobertura dels Sants, Lance Hohaia, sul pilar galés de Wigan Ben Flower. Aquel presèt pas e rebequèt d’un dirècte al morre, redoblat un còp lo Sant faguent Jèsus sus la pelena. La partida s’acabèt aquí pels dos jogaires: per Hohaia assucat e per Ben Flower que l’arbitre gratifiquèt sul pic d’un cartonet escarlata. Flower veniá de faire present del ramelet de la victòria e del titol als Sants. Mas, a 13 contra 12, aquò demorèt complicat. Wigan se multipliquèt en defensa e accelerèt la circulacion de la pauma. Dobriguèt la marca sus penalitat (16a). Percival respondèt pels Sants (29a). Mas l’alièr Joe Burgess puntava l’ensag a la darrièra segonda del primièr temps: 6-2 per Wigan.
 
Dins lo segond temps, Wigan contunhèt d’atacar mas St Helens impausava pichon a pichon son ritme e l’evidéncia de la superioritat numerica. Aprèp una cordelada de tenguts, Soliòla en fòrça marcava al pè dels pals (54a): 8-6. Wigan mancava d’ocasions: una traucada de Farrel, una escapada de Charnley, la penalitat de l’egalitat... E a dètz minutas de la còrna, l’alièr Makinson recuperava una candela entre alièr e arrièr de Wigan, se revirava dins lo placatge e pausava la pauma darrèr la linha. Transformacion en mai e la messa èra dita: 14-6, victòria dels Sants que demoravan sus cinc desfaitas en finala entre 2007 e 2011.
 
Aitant dire que l’entraïnaire de Wigan èra pas brica content del comportament de son pilar!
 
 
Cinquena victòria en campionat per l’AS Carcassona
 
Dissabte, Lesinhan menava 8-2 a la pausa a Vilanuèva, mas poguèt res dins lo darrièr quart d’ora contra lo vam e los dos ensages dels Laupards, victorioses 18-8.
 
Dimenge, a Sant Estève, dins una partida vodada a l’ofensiva ont se marquèt 12 ensages, lo campion Tolosa anèt batre los Dragonets: 38-30.
 
A l’Agulha, Limós signava sa primièra victòria de la sason e fasiá pas las causas a mièja: 56-12 contra Palau.
 
A Avinhon, Carcassona ganhèt 30-14, amb 14 punts al pè de Maxime Gressèque, mas la marca nos ditz pas l’oposicion bèla dels locals que pleguèron solament dins lo darrièr quart d’ora. La partida de l’esquipa de França empacharà pas la tenguda d’una jornada de campionat aquesta dimenjada.
 
Dissabte, Carcassona reçauprà son susprenent segond Vilanuèva (18h30, a Domèc) e Tolosa serà favorit contra Avinhon.
 
Dimenge, dobla confrontacion catalanoaudenca: Palau-Lesinhan e Limós-Dragonets.
 
 
Viatge en Irlanda
 
L’esquipa de França èra recampada a Perpinhan per preparar lo campionat europèu, amb un enjòc bèl: lo primièr jogarà las Quatre Nacions de 2016 amb Anglatèrra, Austràlia e la Nòva Zelanda. Los galons de capitani dels Blaus son fisats al Jason Baitieri.
 
Divendres, Escòcia-Galas dobrirà la competicion. Los Blaus jogaràn dissabte de vèspre contra Irlanda a Dublin e convidan totes los afogats d’Occitània e Catalonha a los sosténer lo dissabte 25 de vèspre a Albi per la partida contra Galas.
 
Lo Torneg de las Quatre Nacions començarà lo dissabte 25 a Brisbane amb las doas partidas sul meteis estadi: Anglatèrra-Samoa e Austràlia-Nòva Zelanda. Una esquipa del president de la federacion australiana, menada per l’ancian Drac Greg Bird, a ganhat sus l’estadi Kalaabod de Kokopo, contra Papoa-Nòva Guinèa: 34-16.
 
 
 
 
Alan Roch
 
Fòtos:
Mas St Helens ganhèt!