Massud Barzani, president del Curdistan del Sud (qu’es lo que fa partida de l’estat iraquian), a reconegut dins una entrevista al mèdia curd Rudaw qu’ara sa prioritat es de luchar contra l’Estat Islamic, e non pas d’organizar lo referendum d’independéncia qu’anoncièt, segon çò que rapòrta Nationalia.
 
Segon Barzani, “l’idèa del referendum […] serà pas jamai anullada”, mas a l’ora d’ara, çò ditz, “nos devèm concentrar sus lo combat contra una organizacion terrorista qu’a las capacitats d’un estat”. Lo president sud-curd a apondut que la vila de Kerkûk “serà compresa dins lo referendum” d’autodeterminacion quand se farà.
 
D’un autre costat, Barzani a explicat que lo sieu govèrn a mandat d’ajuda umanitària a Kobanê, aquela vila del Curdistan Occidental (fasent partida de l’estat sirian) que fa mai de tres setmanas que resistís a una ofensiva fòrça potenta de l’Estat Islamic. Lo cap curd a soslihat que l’estat turc permet pas que cap de fòrça militara travèrse lo territòri turc per arribar a Kobanê. Pasmens la vila es entornejada per l’Estat Islamic de totes los costats mens un, qu’es la frontièra amb l’estat turc.