Las seleccions de fotbòl d’Albania e de Serbia avián pas jamai jogat encara cap de partida dempuèi la Guèrra de Iogoslavia. E malgrat que l’Union Europèa de Fotbòl Associacion (UÈFA) aguèsse l’espèr que i auriá pas de problèmas amb aqueles dos païses, apareguèt la question de Kosova de manièra subta dins la partida de classificacion de ièr per la Copa d’Euròpa 2016. Dins la minuta 41a, l’arbitre decidiguèt d’interrompre la partida quand un dròne subrevolèt l’estadi del Partizan de Belgrad amb una bandièra de la Grand Albania.
 
Quand lo jogaire sèrbe Stefan Mitrović arribèt d’estirar la bandièra e de far davalar l’aparelh al sòl, una bagarra comencèt amb qualques jogaires albaneses. L’arbitre mandèt las doas esquipas el vestiari e, en seguida, suspendèt la partida.
 
La decision de l’arbitre foguèt senada, en veire que i aviá lo perilh que los suportaires sèrbes envasiguèsson lo terren, tant qu’èran ja a lançar de petards, de fuòcs de Bengala e d’objèctes de tota sòrta. De fach, sus las grasas i aviá pas cap de suportaire albanés, en acòrdi amb la recomandacion exprèssa de l’UÈFA
 
Segon de mèdias sèrbes, un fraire del primièr ministre albanés foguèt detengut dins la sala VIP de l’estadi coma possible estigador de l’enaurament del dròne.