Lo fotograf Thom Atkinson, dins la sèria Soldiers’ Inventories, vòl mostrar plan graficament cossí a evolucionat l’esquipament dels soldats dins las darrièras mila annadas. En prenent en compte çò que portava un soldat a la Batalha d’Hastings, en Anglatèrra, en l’an 1066, fins a l’actualitat, en passant per Waterloo e per la Guèrra d’Afganistan.
 
Segur, cada fotografia compren d’armas per tuar d’enemics (de pigassas, de granadas, de fusilhs...), mas tanben d’aisinas per tuar lo temps (de classics jòcs de cartas o de tauletas modèrnas), perque lo cors de las guèrras sovent tanben pòt èsser monotòn e font d’enuèg, çò ditz Atkinson.
 
De la faiçon qu’es presentat lo material, se’n pòt traire de conclusions evidentas, coma los elements que se repetisson mai: los culhièrs e los cascos. O ben que, del mai anam luènh dins lo temps, del mens los soldats portavan de causas al prat batalhièr, per una simpla question de pes.