An inaugurat un nòu zòo que fa l’actualitat sustot pel tipe d’espècias que s’i expausa. Se nomena Micropia, es a Amsterdam (Païses Basses) e se definís coma lo primièr “zòo interactiu de micròbis”, las creaturas microscopicas que compausan dos tèrces de la matèria viva de la nòstra planeta.
 
En contrast amb los zòos tradicionals, Micropia cèrca d’expausar la “micronatura”, que son importància rèsta sosestimada dempuèi que lo scientific neerlandés Antonie van Leeuwenhoek a descobèrt los èssers microscopics al sègle XVII. Cal dire que los micròbis son sovent restacats a las malautiás causadas per de virus, de bactèris e de micòsis, e per contra se pren pas en compte coma caldriá que son a l’encòp essencials per la nòstra subrevivença. Cada uman, per exemple, pòrta dins son còrs aperaquí un quilo e mièg de micròbis, e sens eles moririam.
 
Tocant lo microzòo d’Amsterdam, s’es installat un escanèr que calcula a cada instant quantes micròbis vivon dins lo còrs dels vesitaires, e dins quina zòna. Pels mai ardits i a tanben d’installat un “potonomètre” per los que vòlgan aprene quantes micròbis se transferisson amb un poton.
 
“Una vesita a Micropia cambiarà per sempre vòstre biais de veire lo Mond”, çò ditz la publicitat d’aquel musèu.