Nòva inesperada en Mexic. Las pròvas d’ADN mòstran que los 28 còrses trobats dins doas fòssas de la vila d’Iguala dins l’estat de Guerrero, amb de signes de torturas e d’èsser cremats vius, pertanhon pas als estudiants desapareguts lo 26 de setembre passat, segon çò qu’a anonciat lo procuraire Jesús Murilla Karam.
 
Per contra, Murillo Karam rapòrta qu’an trobat una tresena fòssa que ja i an començat los trabalhs de cavatge. Al delà, lo procuraire a lançat un mandat d’arrèst contra lo cònsol d’Iguala e lo secretari de la seguretat publica, que fugiguèron en seguida de la desaparicion dels 43 estudiants.
 
Mentretant, per tot Mexic i a de manifestacions e tota sòrta de mòstras d’indignacion per la desaparicion d’aqueles 43 estudiants de pedagogia de la comunautat d’Ayotzinapa. Desapareguèron lo 26 de setembre, quand lor autobús foguèt fusilhat per de policièrs e de membres del crime organizat. Dins aquel atac moriguèron tanben tres joves estudiantas, un jogaire de fotbòl —qu’anava dins un autre autobús tanben atacat—, lo menaire de l’autobús e una femna adulta qu’anava en taxi.
 
Cal dire qu’en 1996 lo governador de Guerrero, Rubén Figueroa Alcocer, aviá demissionat en seguida del masèl d’Aguas Blancas. Aquel meteis jorn, lo congrès de Guerrero designèt lo governador remplaçant entrò a la fin de 1999.