Lo jutjament d’aqueste divendres tocant un representant de Libertat a Pau es estat reportat. La jutgessa a suspendut lo procès per cercar un traductor, pr’amor que l’acusat a decidit de parlar solament en occitan. Es lo primièr còp dins l’istòria d’Occitània que se passa un eveniment coma aqueste, ont un jutge francés decidís de demandar un traductor d’occitan.
 
Lo jutjament es acabat e cal esperar la resolucion. Es probable que se torne repetir dins un mes aperaquí, amb l’interpretacion de l’occitan al francés de las declaracions del representant de l’esquèrra occitana.
 
Lo representant de Libertat èra jutjat en seguida que lo movement politic occitan aviá fach circular de prospèctes defendent las Calandretas, ont se qualificava lo prefècte del departament de “persona mespresabla, qui ageish de manièra desleiau”. Aquela campanha seguissiá la menaça de barrar la Calandreta d’Artics (Bearn) e la manifestacion de sosten a l’escòla occitana que se passèt a Pau en febrièr passat.
 
 
Comitat de sosten
 
S’es creat un comitat de sosten amb la tòca de federar e d’organizar la resisténcia. “Qu’insistim suu hèit que tot aquò ei politic, la nosta defensa que’n serà tanben”, çò dison.  Aquel comitat organizèt ja ièr una protèsta davant la cort de Pau e una jornada amb un dinnar popular e divèrsas animacions.
 

Tres meses de secutament policièr
 
Fa tres meses que lo movement occitan d’esquèrra revolucionària patís una ofensiva policièra sens precedents. De militants son estats convocats cinc còps per la polícia, en mai del que serà jutjat. Acusan la comuna de Pau e las autoritats departamentalas de cercar, e quitament de provocar, los mendres pretèxtes per barrar la Tor deu Borrèu, al quartièr del Hedars, a Pau (Bearn), qu’es lo local social de Libertat.
 
De fach, lo 21 de junh passat, la Fèsta de la Musica s’acabèt ailà amb de susmautas. La polícia metèt fin d’una faiçon plan violenta als concèrts que s’i debanavan. Aquela accion policièra, segon la còla de Libertat, poiriá èsser premeditada per criminalizar l’esquèrra occitanista. Segon la version oficiala, la polícia demandèt d’arrestar los concèrts a 1 ora, e a 2 oras un trentenat de policièrs intervenguèron per metre fin a la fèsta. Mas segon la version de l’organizacion, de policièrs de divèrses còrses (municipala, nacionala, CRS e BAC) faguèron irrupcion quand lo darrièr grop acabava de jogar, en tustar lo material dels grops, en ensajant aital d’aturar la musica e en lançant de gases lacrimogèns e de flashballs abans que lo mond reagiguèsson. Lo mond respondèron sul pic a l’agression e se descadenèt la violéncia. Aqueles escambis violents s’acabèron amb la preson ferma per doas personas e amb de sosta per doas autras.
 
 

fffff		fffff
	Al començament dels ans 80, Sèrgi Viaule, collaborador de Jornalet, ja s’exprimiguèt en occitan davant un tribunal coma objector de consciéncia, que refusava de far lo servici militar obligatòri en aquela epòca; mas lo tribunal li refusèt un traductor d’occitan.