La seleccion occitana de fotbòl a demostrat una capacitat ofensiva notabla pendent la primièra fasa de l’Europeada 2012 e a ganhat tres partidas consecutivas que l’an plaçada en quatrens de finala. Aquel campionat, que se jòga dins lo territòri de Lusàcia —lo país dels sorabs o lusacians, dins l’estat alemand de Saxònia—, compta amb la participacion de 18 esquipas de minoritats lingüisticas europèas, en parallel a l’Èuro 2012 que se jòga en Polonha e en Ucraïna, que i an solament accès las nacions qu’an ja capitat l’Estat pròpri. L’Europeada 2012 se jòga dempuèi lo 17 de junh e se finirà deman.

L’esquipa sang e aur venquèt aisidament lo País de Galas per cinc gòls a dos, venquèt après los cimbres d’Itàlia de faiçon frapanta per cinc gòls a zèro e, fin finala, batèt la seleccion dels daneses d’Alemanha per un ajustat un a zèro. Aquela darrièra victòria a un meriti especial, pr’amor que los daneses alemands demorèron semifinalistas dins l’Europeada precedenta, debanada en 2008.
 
Dimècres passat, après la primièra fasa eliminatòria, la jornada foguèt liura de partidas e se consagrèt a far de vesitas culturalas dins lo país del campionat, mai que mai dins la polida vila de Budyšin (Bautzen). En aquel sens, las esquipas internacionalas aprigondiguèron lor coneissença de la cultura soraba e mai que mai de la siá gastronomia.

Ièr, dijòus, la seleccion nacionala occitana intrèt en la seguenta fasa del campionat amb una partida contra Sud Tiròl ont perdèt per tres gòls a zèro. S’agís d’un rival fòrça complicat perque ganhèt l’Europeada 2008. Lo seleccionaire nacional occitan, Deidièr Amiel, considèra qu’aquela partida es “malaisida”, agravada pel fach qu’Occitània a ja dos jogaires fòra combat per lesions: lo capitani Nicolas Desachy e lo jogaire Julien Cantier.