A Gardana (País d’Ais), ont ganhèt lo PCF, l’eleccion s’es anullada perque sus la lista i aviá una persona inelegibla segon la justícia. Al Pontet (Comtat Venaicin), ont ganhèt l’FN, la justícia a trobat d’irregularitats en la campanha electorala.
Lo tribunal administratiu anullèt dimars passat l’eleccion de las municipalas a Gardana (País d’Ais), segon çò que rapòrta La Provence. Lo cònsol destituit, Roger Meï, del Partit Comunista Francés (PCF), a decidit de portar l’afar davant lo Conselh d’Estat, segon çò que rapòrta Metro News.
Meï publiquèt un comunicat en soslinhant que lo tribunal “reten ges de fraudariá electorala”. Al delà lo cònsol apondèt que “lei còmptes de campanha son aprovats e confirman la nòstra onestetat”.
Mas çò qu’a menat la justícia a anullar l’eleccion es la denóncia venent de la lista del Partit Socialista e dels ecologistas, perque sus la lista del PCF i aviá una persona inelegibla. Se tracta de Jean-Marc La Piana, un mètge director d’un establiment de suènhs palliatius a Gardana. La justícia a estimat que lo domicili de La Piana a Gardana es fictici perque demòra a Ais de Provença e es ailà que paga sas taxas.
Lo Pontet: eleccion anullada per d’irregularitats en campanha
Al Pontet (Comtat Venaicin) s’es passat quicòm de similar. Lo cònsol del Front Nacional, qu’es vengut conegut per eliminar la cantina gratuita o per s’aumentar lo salari al dessús de la legalitat, a tanben vist son eleccion anullada. La justícia a considerat “tròp de causas pas claras” dins la campanha electorala, e dijòus passat anullèt lo vòte, en seguida d’una demanda de l’UMP.
Demest las irregularitats, i auriá de difusion de publicitat electorala la velha del segond torn, après lo barrament de la campanha, e sustot de listas de signaturas que variavan entre lo primièr e lo segond torn, e quitament de signaturas falsas.
Segon çò que rapòrta Libération, lo cònsol del Pontet s’apelarà de la decision en justícia.
Se l’eleccion se repetís, serà interessant d’analisar la mobilizacion dels electors e lor vòte, après aver experimentat de près las politicas totalitaristas de l’FN al Pontet.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
I a pas cap de comentari
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari