Lo trafec a Marselha visquèt divendres una de sas jornadas mai complicadas. Lo transpòrt public de la Ciutat Focèa, bus, tramvai e mètro, s’arrestèt en protèsta après qu’un bus de la linha 36 foguèsse tocat per de projectils. E mai se s’es pas confirmat que foguèt una fusilhada, la polícia parla d’un “trauc de tres centimètres dins una vitra laterala e una frema leugierament ferida per lei bocins”. Lo menaire del bus foguèt chocat.
 
Lo bus foguèt tocat a 12h15, e a 13h los autobuses de Marselha s’èran totes arrestats. A partir de 14h los tramvais seguiguèron la cauma e lo mètro interrompèt lo servici entre 14h30 e 15h. De ser se debanèt una reünion entre los sindicats e la direccion del ret de transpòrts publics de Marselha (RTM). La circulacion en veitura dins la vila se vegèt paralisada.
 
Los salariats reprenguèron lo trabalh dissabte de matin, mas an mostrat lor chepic. “Es pas lo primier còp qu’aquò arriba”, çò diguèt un responsable de la CGT a La Provence, en soslinhant qu’aqueste estiu sièis autobuses son estats tocats per de Kalashnikovs. “Prenon lei tramvaiers per de pijons”, çò apondèt. Al delà se demandava mai de seguretat: “Perqué la polícia municipala es pas pus presenta dins l’RTM, coma se fai a Tolon?”
 
La direccion de l’RTM, per contra, assegura que “dempuei 2009 lei fachs an demenit, e mai s’es verai que i a de zònas dificilas que i an comés d’actes d’incivilitats”.
 
Dins la reünion, los sindicats e la direccion ensagèron de trobar, non pas de solucions, mas de mejans de reduire los risques. S’installarà un desviament, e los sindicats rescontraràn lo director de la seguretat publica per far una reünion de seguretat intèrna.



Le 18:18 : Marseille paralysée par un tir de...per LaProvence