Mai de 100 000 personas (108 000 segon la polícia) s’acampèron ièr dimenge dins la Plaça de Catalonha, a Barcelona, per demandar als partits catalans l’unitat fàcia al procès d’independéncia de Catalonha. Apelats per l’Assemblada Nacionala Catalana (ANC) e per Òmnium Cultural, los manifestants mostrèron lor sosten al vòte del 9 de novembre que ven, e exigiguèron d’eleccions plebiscitàrias abans tres meses, per la constitucion del Parlament que declararà l’independéncia de Catalonha.
 
Çò que deviá èsser un acte de campanha electorala pel vòte de l’independéncia devenguèt una manifestacion massissa e revendicativa. En seguida de l’enebicion pel govèrn espanhòl de far un referendum, lo president de Catalonha, Artur Mas, prepausèt un vòte popular pel 9 de novembre que ven, que provoquèt lo desacòrdi dels principals partits, que s’èran units dins lo procès d’independéncia.
 
“Sostenèm la consulta del 9 de novembre mas en contrapartida exigissèm l’unitat politica e d’eleccions. Volèm votar dins los tres meses que venon. President, volèm començar la prima de 2015 amb un nòu Parlament constituit”, çò diguèt la presidenta de l’ANC, Carme Forcadell, en s’adreiçar al president de Catalonha, Artur Mas. De representants de la seccion aranesa de l’ANC èran tanben presents.
 
Après las dichas de qualques personatges publics catalans, amb la musica de Lluís Llach, Cesc Freixas e la participacion de las actrises Sílvia Bel e Carme Sansa e mai del jornalista Miquel Calzada, entretant, l’acamp s’acabèt per una cantada massissa de l’imne catalan, Els Segadors, que podètz veire dins aqueste vidèo.
 
 

Cant dels Segadors a plaça Catalunyaper vilawebtv





'N’estem farts, volem una data, volem unes...per vilawebtv