Cal èsser d’un optimisme bèl per pas plorar coma de fonts: lo XIII de França s’es fait susprendre per unes valents irlandeses. Mobilizacion generala per l’afrontament de dissabte a Albi amb Galas.
 
 
Lo malcòr dels Pols
 
Cada tardor, es complicat de ramosar una esquipa nacionala sens los Dracs cansats d’una sason bèla, amb de Dragonets maluroses d’aver pas jogat fòrça amb los Dracs e de jogaires d’Elèit convidats quand se pòt pas faire autrament. E es pas la qualitat d’una esquipa sul papièr que fa sa fòrça, mas sa volontat e sa valentesa. E d’aquò los irlandeses n’an a emplenar la mar, amb son esquipa de jogaires de Championship, tres jogaires del campionat amator local o lo centre Paecock que jòga ongan en Nacionala 1 a Vilanòva de Menerbés. Ajustatz aquí dessús En Ben Thaler e son arbitratge nèutre e britanic: dotze penalitats contra los Blaus, 3 o 4 contra los Verds, un ensag refusat a Barthau que daissa nafrat sos companhs a la mièja ora. E tot èra en plaça per una resulta suspresa: la victòria d’Irlanda 22-12.
 
La tartuga capitèt pas a agantar la lèbre: los Verds menavan 8-0 a la pausa, 16-0 un quart d’ora mai tard. Larroyer e Pelissièr marcavan, Marginet transformava: retorn a 16-12. Mas lo mot de la fin èra per l’alièr Murphy.
 
Galas tanben a pres una brandida tre divendres a Workington: 42-18 pels escoceses menats pel Danny Brough.
 
Dissabte, Irlanda reçauprà Escòcia e França jogarà a Albi (Estadi, 15h) fàcia a Galas. Una sola obligacion: la victòria se l’òm vòl encara ganhar lo Torneg per prene part a las Quatre Nacions de 2016!
 
Noveltat: coma cap de cadena de television assegura pas la retransmission en dirècte, la Federacion retransmetrà la partida en estriming sus son sit!
 
 
L’afrontament bèl
 
Dissabte, se dobrirà a Brisbane lo Torneg de las Quatre Nacions amb las doas partidas en seguida: Anglatèrra-Samoa (7h55 del matin, ora occitana) e Austràlia-Novèla Zelanda (10h25, ora occitana). Las doas partidas se poiràn seguir sus BeIn Sport.
 
 
La vida en ròse per Carcassona
 
La jornada del campionat Elèit prepausava tres rescontres.
 
Los Dragonets demandèron lo repòrt del viatge a Limós, coma avián fòrça jogaires en esquipa de França.
 
Dissabte en serada, Tolosa ganhèt, mas foguèt pas simple, contra Avinhon: 18-10.
 
A Domèc, se teniá la confrontacion entre lo cap de fila local e sa segonda, Vilanuèva d’Òlt. La partida virèt a una demostracion dels Jaune e Negre (perdon, dels Ròses que, per l’escasença del Mes Ròse —pel depistatge del càncer de la popa—, los Canaris èran vestits de ròse coma de becaruts de l’estanh de Grussan). E vegèron la vida en ròse: uèit ensages (tres pel centre Jerèmias Guiraud) amb 7 transformacions del Maxim Gressèque: 46-0 al planchòt final! E un jove renfòrç neozelandés va encara arribar dins la setmana.
 
A Palau, los locals avián de se faire perdonar lo carton encaissat a Limós la setmana passada. Trobèron la victima designada en la persona de l’esquipa de Lesinhan en cèrca de sas marcas en aquesta debuta de sason. La dintrada del mesclanha australian Farlow cambièt res al problèma constatat per la resulta del rescontre: 34-14 pels catalans.
 
Pas de partida aquesta dimenjada en rason de França-Galas.
 
 
Un dimenge al femenin
 
Lo XIII se jòga tanben al femenin. Aqueste 19 d’octobre, èra lo Dimenge Magic de las 25 formacions femininas sus l’estadi Benausse a Carcassona. Una partida França A-França B se jogarà dissabte en dobertura a Albi.
 
 
Dracs 2015
 
La Rugby League ven de desvelar lo calendièr 2015 de la Superliga: los Dracs entamenaràn la sason novèla lo divendres 6 de febrièr cò dels campions de Saint Helens.