Publicàvem divendres passat la nòva sus la brutalitat policièra de la gàrdia civila espanhòla contra los immigrants qu’ensajan de sautar la barrièra de Melilla. Dins aquela nòva se podiá veire un vidèo difondut per l’associacion Prodein, que los policièrs i batián un jove fins que perdèt consciéncia e que lo daissèron aital sul sòl de Marròc.
 
Aquel jove veniá de Cameron, li dison Dani, a perdut un ren e a mièg còrs paralisat, segon çò qu’a dich a El Diario lo president de Prodein, que contactèt Dani après que sortiguèsse de l’espital de Nador (Marròc).
 
Ara, los de Prodein espèran que Dani s’installe dins un luòc permanent, probablament en un dels campaments que los quites migrants an fach sus las montanhas pròchas a la barrièra frontalièra. Aital li provesirián los medicaments que n’aurà de besonh.
 
Après la difusion dels imatges, lo Comissariat dels Dreches Umans del Conselh d’Euròpa a demandat a l’estat espanhòl de dobrir una enquèsta e d’“atribuir de responsabilitats”, tant per la violéncia exercida aquel jorn contra los migrants coma per las devolucions illegalas en Marròc. Remandar en Marròc los migrants que capitan a sautar la barrièra es illegal, segon la Lei espanhòla sus los estrangièrs e segon l’acòrdi signat entre los estats espanhòl e marroquin.
 
Lo comandant en cap de la gàrdia civila de Melilla es imputat per un eventual delicte de prevaricacion, per aver ordenat aquela practica, en sabent qu’es pas legala. 
 

Así defiende "España" el ministerio del interior. de l'Asociación Pro.De.In. Melilla sus Vimeo.